Майкл Блумберг сайловолди кампаниясида маҳбуслар меҳнатидан фойдаланишни бекор қилди

АҚШ президентлигига номзод ва миллиардер Майкл Блумберг президентлик кампаниясида унинг сайловолди штаби маҳҳбуслар меҳнатидан фойдаланишни бекор қилганини билдирди. Meduzaнинг хабар беришича, бу ҳақда у ўзининг Twitter’даги саҳифасида маълум қилди.

Унда айтилишича, Блумберг вакиллари маҳбуслар меҳнатидан фойдаланилаётгани тўғрисида сайловолди штабига журналист мурожаат қилганидан сўнг билган. Шундан сўнг штаб бу амалиётни қўллаб-қувватламагани сабабли ундан дарҳол воз кечган.

Маҳбусларнинг меҳнатидан фойдаланиш тўғрисида биринчи бўлиб хабар берган The Intercept нашрига кўра, Блумберг сайловолди штаби воситачи орқали cаll-марказларини, шу жумладан, қамоқхоналар базасида ишлайдиган cаll-марказларини бошқарувчи ProCom компанияси билан шартнома имзолади.

Нашрда таъкидланишича, Блумберг номидан Оклаҳомадаги аёллар қамоқхонасидаги мабуслар қўнғироқ қилган.

Нью-Йоркнинг собиқ мэри, миллиардер Майкл Блумберг ноябрь ойида Демократлар партиясидан АҚШ президентлигига номзодлигини эълон қилган. У президентлик пойгасига Дональд Трампни ютиш учун эмас, Американи жонлантириш учун киришганини билдирган.

Маълумот учун, штатларда демократлардан номзод кўрсатиш 2020 йилнинг февралидан бошланади. Номзод узил-кесил аниқланадиган партия съезди эса июль ойида бўлиб ўтади.