Хитой футбол ассоциацияси клуб футболига оид бир қатор қарорлар қабул қилди.
2020 йилги мавсумдан бошлаб чет элдан келадиган футболчининг йиллик маоши 3 миллион евродан ошмаслиги белгилаб қўйилди. Мазкур маош чегарасига бонус ва солиқлар кирмайди.
Бу қоида Хитойга чет элдан кўплаб юлдуз футболчилар келишини деярли тўхтатади. Маълумот учун «Шанхай СИПГ» футболчилари Халк ва Оскар йилига мос равишда 20 ҳамда 25,5 миллион евро миқдорида пул ишлайди.
Янги маош тизими январдан кучга киради. 3 миллион — фақат легионер футболчилар учун амал қилади. Хитойлик футболчилар учун тўланадиган йиллик маош эса 10 миллион юандан (1,29 млн евро) ошмайди. Хитой терма жамоаси футболчилари учун 20 фоизлик устама ҳақи назарда тутилган.
21 ёшгача бўлган хитойлик футболчилар эса йилига кўпи билан 300 минг юан (38,64 минг евро) маош олиши мумкин.
Легионерлар лимитига келадиган бўлсак, 2020 йилдан Хитой Суперлигаси клублари ўйин қайдномасига кўпи билан беш нафар чет эллик футболчини кирита олади ва уларнинг фақат тўрттаси бир вақтда майдонда ҳаракат қилиши мумкин. Осиёлик футболчилар учун алоҳида ўрин ажратилмаган, яъни осиёлик ўйинчи ҳам чет эллик мақомида бўлади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)