«Яндекс» 2019 йилнинг январь ойида Ўзбекистон йўлларидаги тирбандликларни кўрсатишни бошлади. Компания 11 ойдан сўнг йил якунлари бўйича маълумот берди ва Тошкент шаҳри йўлларидаги тирбандлик ҳолати қандай ўзгарганини маълум қилди. Бу ҳақда Spot хабар берди.
Тирбандликларнинг ўртача даражаси апрель—август ойларида 5,8 баллдан 4,5 баллгача ўзгарган. Автомобиль ҳайдовчилари учун энг қулай вақт ёз ойлари бўлган, энг оғир ой эса апрель ойи бўлган. Мазкур ойда баҳордаги эрталабки тирбандликларнинг энг юқори даражаси қайд этилган бўлиб, у 7 баллни ташкил қилган.
Апрель ойидан августгача ҳар ой давомида тирбандликлар камайиб борган. Ўқув йили бошлангач, сентябрь ойида тирбандликлар даражаси августга нисбатан эрталаб 1,5 баллга, кечқурун эса қарийб бир баллга ошган.
Октябрь ойида тирбандликлар даражаси яна юқорилаган, кечки пайт юзага келадиган тирбандликлар даражаси 8 баллга етган. Эрталабки тирбандликлар эса нисбатан енгилроқ ўтган. Кузда тирбандликнинг ўртача даражаси 7 баллдан сал камроқ бўлган.
Тошкентда дам олиш кунларидаги тирбандликлар иш кунларидагига нисбатан камроқ бўлади. Бунда шанба ва якшанба кунлари эрталаб тирбандлик деярли сезилмайди. Кечқурун эса тирбандликлар сақланиб қолмоқда. Ноябрь ойида кечки тирбандлик шанба кунлари 7 баллни, якшанба кунлари эса 6 баллни ташкил қилган.
Изоҳ (0)