Беларусь президени Александр Лукашенко ҳазил тариқасида Россиянинг республика таркибига қўшилишини таклиф қилди, деб хабар беради «РИА Новости».
Ушбу таклиф икки мамлакат ўртасидаги иқтисодий интеграцияни чуқурлаштириш бўйича олиб борилаётган музокаралар вақтида, шунингдек, Беларусь ва Россиянинг бирлашиш эҳтимоли тўғрисида матбуотда вақти-вақти билан муҳокама қилинаётган мавзулар пайтда билдирилди.
«Ягона давлат борасида Россия ҳам, Беларусь ҳам қабул қилиши мумкин бўлган энг оддий вариант — Беларусь таркибига қўшилиш. Ҳа, нима россияликлар бунга қаршими? Йўқ. Беларуслар ҳам қарши эмас», — дея ҳазиллашади Лукашенко.
Жорий йил охиригача икки мамлакатнинг иқтисодий тизимларини бир-бирига яқинлаштириш режаси имзоланиши тахмин қилинган эди. Бироқ йўл хариталарини тасдиқлаш давом этмоқда. Имзоланиши лозим бўлган ҳужжатлар орасида Беларусга етказиб бериладиган газ нархи, шунингдек, ягона солиқ қоидаларини яратиш масалалари мавжуд.
Россия иқтисодий ривожланиш вазвири Максим Орешкиннинг айтишича, ягона валютани жорий этиш масаласи сўнгги навбатда муҳокама қилинади.
7 декабрь куни Минскда Россия билан чуқурлашган интеграцияга қарши норозилик намойишлари бўлиб ўтган эди. Уларда бир неча юз киши қатнашиб, интеграция борасидаги режалар Беларусь мустақиллигига таҳдид солишини айтишган.
Изоҳ (0)