Республика миқёсида ўтказиб келинаётган «Энг китобхон мактаб» лойиҳасининг Қашқадарёдаги ғолиби — Косон туман халқ таълими бўлимига Nexia-3 автомобили топширилди, — дея хабар беради «Дарё» мухбири.
Маълум бўлишича, «Китоб дунёси тармоқ савдо маркази» томонидан ташкил этилган лойиҳа вилоятда 100 кун давом этган бўлиб, шу фурсат давомида 350 минг дона китоб сотилган. Харид қилинган китобларнинг 75 мингтаси косонлик китобхонлар томонидан сотиб олинган.
— Мазкур лойиҳамиз республика бўйлаб ўтказилиши мўлжалланган бўлиб, биринчи босқичини 100 кун деганда якунладик, — дейди лойиҳа раҳбари Шуҳратжон Оҳунжанов. – Насиб этса бошқа вилоятларда ҳам давом этаётган лойиҳамизнинг ғолибларига автомобиль совға қилишни ният қилганмиз.
Маълумот ўрнида: «Энг китобхон мактаб» лойиҳасида 2-ўрин Яккабоғ туман халқ таълими бўлимига насиб этган бўлса, 3-ўрин Миришкор туман халқ таълими бўлимига берилди.
Эслатиб ўтамиз, Тошкент шаҳрида бўлиб ўтган «Ёш китобхон» кўрик-танловининг республика босқичида Косон туманидаги 15-мактабнинг она тили ва адабиёт фани ўқитувчиси Сурайё Шодиева 20-30 ёшлилар орасида 1-ўринни эгаллаб, Президент совғаси – Spark автомобили билан тақдирланганди.
Изоҳ (0)