Ўзбекистондаги корхона-ташкилотларнинг 65 фоизи хизматлар соҳасида фаолият кўрсатаётгани маълум бўлди

Жорий йил 1 декабрь ҳолатига Ўзбекистонда фаолият кўрсатаётган жами корхона ва ташкилотлар сони 395,9 минг бирликка етди. Бу ҳақда Давлат статистика қўмитаси хабар берди.

Жумладан, хизматлар соҳасида жами 260,2 минг бирлик корхона ва ташкилот фаолият кўрсатмоқда. 2018 йилнинг шу даврига нисбатан уларнинг ўсиши 22,7 фоизга етди.

2019 йил 1 декабрь ҳолатига хизматлар соҳасида фаолият кўрсатаётган корхона ва ташкилотларнинг улуши 65,8 фоизни ташкил етди.

Таққослаш учун: кузатилаётган даврда саноат соҳасида фаолият кўрсатаётган корхона ва ташкилотларнинг улуши 17,8 фоиз, қурилиш 9,1 фоизга етди ва атиги 7,3 фоиз қишлоқ, ўрмон ва балиқ хўжалиги соҳаси ҳиссасига тўғри келди.

Хизматлар соҳасида фаолият кўрсатаётган корхона ва ташкилотлар таркибида савдо фаолияти билан шуғулланувчи корхона ва ташкилотлар (38,3 фоиз) юқори улушни эгаллайди.Истиқомат қилиш ва овқатланиш бўйича хизмат кўрсатувчи корхона-ташкилотлар 9,8 фоизни ташкил этди.

Ташиш ва сақлаш фаолияти билан шуғулланувчи ҳамда хизматлар соҳасидаги тегишли фаолият кўрсатаётган корхона ва ташкилотлар улуши уларнинг умумий сонида 5,9 фоизга етди.

Ахборот фаолияти билан шуғулланувчи ва алоқа хизматларини кўрсатувчи корхона-ташкилотларнинг улуши 3,0 фоизга тенг бўлди.

Соғлиқни сақлаш, шунингдек, ижтимоий хизматлар соҳасида фаолият кўрсатаётган корхона-ташкилотларнинг улуши ҳам 3,0 фоизни ташкил этди.