Навоий вилояти Хатирчи тумани «Тошқулоқ» маҳалла фуқаролар йиғини профилактика инспектори ёрдамчиси Собир Эшназаров тўлғоғи келган аёлга ёрдам кўрсатиб, унинг фарзандини дунёга келтиришига ёрдам кўрсатди. Бу ҳақда вилоят ИИБ ахборот хизмати хабар бермоқда.
Воқеа 19 декабрга ўтар кечаси соат 03:30 атрофида юз берган. Ўз хизмат вазифасини ўтаётган Собир Эшназаров Жамоатчилик назорат маскани яқинидаги дўкон олдида бир аёлнинг бақираётганини эшитиб қолган. Зудлик билан овоз чиқаётган томонга борган вақти бир ҳомиладор аёл тупроққа беланганича ёрдам сўраётганини кўрган.
Собир Эшназаров зудлик билан вазиятни тушуниб, ўзи кийиб юрган устки кийимини ечиб, аёлнинг ўз имкониятини ишга солиб, фарзанд туғишига ёрдам кўрсатган. «Бу ҳаракати билан Собир Эшназаров она ва фарзанднинг тирик қолишига сабабчи бўлган», — дейилади Навоий вилояти ИИБ ахборот хизмати хабарида.
Шундан сўнг зудлик билан қўл телефонида туман тез ёрдам бўлимига қўнғироқ қилган. Воқеа жойига етиб келган шифокорлар она ва болани Хатирчи туман туғуруқ бўлимига олиб кетган. «Ҳозирда уларнинг саломатлиги яхши ҳолатда эканлигини шифокорлар тасдиқлади», — дейилади вилояти ИИБ ахборот хизмати хабарида.
Хатирчи тумани туғуруқ бўлими навбатчи врачи Равшан Элиевнинг сўзларига кўра, она ва болага ўз вақтида ёрдам кўрсатилмаганида, уларнинг ҳаётини сақлаб қолиш мушкул бўларди, шу сабабли ҳам профилактика инспектори ёрдамчисининг кўрсатган жасорати айни муддао бўлган.
Изоҳ (0)