ФВВ 18 декабрь куни содир бўлган Юнусобод метроси қурилишидаги фожиа юзасидан қидирув-қутқарув ишлари якунланганини маълум қилди.
Президент топшириғига мувофиқ содир бўлган ҳодиса сабаблари ва оқибатларини жойида ўрганиш, зудлик билан бартараф этиш, жабрланганлар ва уларнинг оила аъзоларига ёрдам кўрсатиш мақсадида ҳукумат комиссияси тузилган эди.
Вазирлик хабарида таъкидланишича, воқеа жойида олиб борилган тезкор қидирув-қутқарув ишлари натижасида олти нафар фуқаронинг жасади тупроқ остидан олиб чиқилиб, уларнинг шахси аниқланган. Қидирув-қутқарув ишлари якунланиб, комиссия ишининг биринчи фазаси ниҳоясига етди.
Айни пайтда комиссия томонидан ҳодиса сабаблари ва оқибатларини ўрганиш ҳамда бартараф қилиш ишлари жадал давом эттирилмоқда, мазкур ҳолатнинг вужудга келишига сабабчи бўлган ва йўл қўйган масъул ташкилот ва шахслар аниқланмоқда. Шунингдек, лойиҳани амалга ошириш жараёнида шу ва бошқа кўнгилсиз ҳолатлар такрорланишини олдини олиш юзасидан зарур чора-тадбирлар ишлаб чиқилмоқда.
Бахтсиз ҳодиса оқибатида ҳалок бўлганлар яшаш манзилига етказилган. Пудратчи-қурувчи ташкилотлар томонидан уларнинг оила-аъзолари ва яқинларига 100 миллион сўмлик дастлабки товон пуллари тўлаб берилган. Шу билан бирга, амалдаги қонунчиликка асосан қўшимча компенсация пуллари тўлаб берилади.
«Айни пайтда вилоятлар ҳокимликлари ва жамоатчилик вакиллари марҳумларнинг оиласидан хабар олиб, зарур ёрдам кўрсатмоқда», — дейилади хабарда.
Изоҳ (0)