Сурхондарё вилояти халқ таълими бошқармаси Дарё нашрида ёритилган «Сурхондарёда 2 миллион сўм пора олган мактаб директори қўлга тушди» номли хабарга муносабат билдирди.
Бошқармага кўра, жорий йилнинг 11 декабрь куни Сурхондарё вилояти Ангор туманидаги 26-умумтаълим мактаби директори О.Н. мактабнинг математика фани ўқитувчисидан пора олаётган вақтда Ангор тумани прокуратураси қошидаги департамент ходимлари томонидан ўтказилган тезкор тадбир давомида қўлга олинган. Унга нисбатан Жиноят Кодексининг 210-модда 1-қисми (пора олиш) билан қайд этилган жиноятни содир этганлиги учун жиноят иши очилиб, мазкур ҳолат юзасидан тергов-суриштирув ишлари олиб борилмоқда.
«Вилоят халқ таълими бошқармасида мазкур ҳолат муҳокамаси ва шу каби жиноятларнинг олдини олишга қаратилган бошқарма раҳбарияти ва барча ходимлари ҳамда туман-шаҳар халқ таълими бўлими раҳбарлари иштирокида йиғилиш бўлиб ўтди. Шунингдек, йиғилишда бу каби иллатларни кескин бартараф этиш билан бир қаторда, келгусида содир этилишининг олдини олиш юзасидан чора-тадбир белгилаш, соҳа ҳодимлари ўртасида кенг тушунтириш ишлари олиб бориш бўйича топшириқлар берилди», — дейилади хабарда.
Изоҳ (0)