Ўзбекистон Президенти Шавкат Мирзиёев жорий йилнинг март ойи бошида Наманган вилоятига ташрифи чоғида ички ишлар вазирлигида фаолият юритаётган ортиқча вазнга эга ходимлар ҳақида гапириб ўтганди. Шундан сўнг бу борада қандай ишлар амалга оширилганлиги тўғрисида Ички ишлар вазирлиги расмийси 19 декабрь, пайшанба куни Ахборот ва оммавий коммуникациялар агентлигида ўтказилган матбуот анжуманида муносабат билдирди. Бу ҳақда «Дарё» мухбири Миролим Исажонов хабар бермоқда.
ИИВ Кадрлар бош бошқармаси бўлим бошлиғи Фарид Абдиевнинг маълум қилишича, танқиддан сўнг тизимдаги тиббиёт хизматларида ҳар бир ходимнинг қайтадан вазни ўлчаб чиқилган. Белгиланган меъёрдан ортиқ бўлган ходимлар рўйхати алоҳида юритилиб, бу бўйича тиббий профилактика ишлари олиб борилди. Ўз устида ишламаётганлар ҳам рўйхатга олинган. 2020 йилнинг биринчи чораги давомида патруль-пост хизмати, ЙПХ ходимлари аттестациядан ўтказилади. Шу жараёнда уларнинг ишда қолиш ёки қолмаслик масалалари кўриб чиқилади.
«Ўз устида ишламаган, семизлик даражасини камайтиришга эришмаган ходимларга маълум муддатга имконият тақдим этилган. Тиббий йўналиш ва овқатланиш рациони бўйича тавсиялар берилган. Бундан ташқари жисмоний тайёргарлик борасида ҳам машғулотлар ўтказилган», — деди Фарид Абдиев.
«Дарё» манбасининг айтишича, тадбирда ортиқча вазнга эга ходимлар сони 30 фоизга камайгани таъкидлаб ўтилган. Аммо улар бўйича аниқ статистик маълумотлар ошкор этилмаган.
Эслатиб ўтиш жоизки, давлат раҳбари Наманганда бўлиб ўтган фаоллар йиғилишида «Бизга ортиқча вазнга эга зобит, ички ишлар ходими керак эмас. Бу ҳолатда қандай қилиб жиноятчини тутади? Спорт билан шуғуллансин. Бу менга эмас, ўзларига фойда. Муддат берамиз: уч ойми, олти ойми, шу вақт ичида ўзини ўнглаб, меъёрдаги вазнга тушсин», деган эди.
Шунингдек, Президент жисмоний тарбия ва спортга эътибор нафақат ушбу тизимларда, балки барча даражада кучайтирилиши, соғлом миллатга айланиш, салбий иллатлар, хусусан, ичкиликбозликка қарши мунтазам курашиш лозимлигини таъкидлаганди.
Изоҳ (0)