Шавкат Мирзиёев 18 декабрь, чоршанба кунининг иккинчи ярмида Токио шаҳридаги Акасака қароргоҳида Япония бош вазири ўринбосари, молия вазири Таро Асони қабул қилди.
Президент матбуот хизматининг хабар беришича, учрашувда инвестициявий, технологик, молиявий ва молиявий-техник ҳамкорликни кенгайтириш ҳамда қишлоқ хўжалиги, энергетика ва бошқа соҳаларда қўшма лойиҳаларни илгари суриш истиқболлари муҳокама қилинди.
Ташриф давомида солиқ соҳаси ва божхона иши бўйича имзоланаётган икки томонлама битимлар аҳамияти қайд этилиб, бу узоқ муддатли ишбилармонлик алоқаларни ривожлантириш учун қулай шароитлар яратиши таъкидланди.
Шу куни Президент Япония парламентининг Ўзбекистон билан дўстлик лигаси вакиллари билан ҳам учрашган. Тадбирда ушбу лиганинг қатор аъзолари, жумладан, унинг раиси Таро Асо иштирок этган.
Қайд этилишича, мулоқот чоғида мамлакатлар амалий ҳамкорлигини кенгайтириш, Ўзбекистон ва Япония халқлари дўстлигини мустаҳкамлашнинг долзарб масалалари кўриб чиқилган. Парламентлараро форумнинг иккита қўшма мажлиси бўлиб ўтган. Унинг учинчи мажлисини Тошкентда ўтказиш тўғрисида келишувга эришилган.
Шавкат Мирзиёев, шунингдек, Токио шаҳрида Япония ишбилармон доиралари вакиллари билан учрашув ўтказди. Унда JETRO, JICA, JABIC, NEDO, JOGMEC, Mitsubishi, Itochu, Sumitomo, Marubeni, Isuzu каби корпорация ва компаниялар, молиявий тузилмалар раҳбарлари иштирок этган.Учрашув аввалида 16 декабрь, душанба куни Токиода бўлиб ўтган Япония—Ўзбекистон бизнес форуми натижалари ҳақида ахборот берилган.
Президент Япония компаниялари ва молиявий тузилмаларини Ўзбекистонда инвестиция лойиҳаларини амалга оширишда фаол иштирок этишга таклиф этган.
«Япония — бизнинг стратегик шеригимиз. Ўзбекистонда иқтисодиёт тармоқлари ва инфратузилмани модернизация қилиш бўйича ҳамкорликда кўп ишлар қилинди. Биз бу алоқалар тарихида янги саҳифа очиш ниятида келдик. Савдо, энергетика, геология, кимё, транспорт, туризм, мева-сабзавотларни қайта ишлаш ва хизмат кўрсатиш тармоқларида имкониятлар, янги лойиҳалар кўп», — деган Шавкат Мирзиёев.
Шунингдек, ишбилармонлик муҳитини яхшилашга қаратилган ушбу янгиланишлар натижасида Жаҳон банкининг «Бизнесни юритиш—2020» рейтингида Ўзбекистон охирги бир неча йил ичида 100 поғонага кўтарилиб, 69-ўринни эгаллади ҳамда йигирмата энг намунали ислоҳотчи давлат қаторига қиргани, янги корхона очиш қулайлиги бўйича Ўзбекистона илк бор дунёда саккизинчи ўринни эгаллаганини таъкидлаб ўтган.
Изоҳ (0)