18 декабрь, чоршанба куни Ўзбекистон Марказий сайлов комиссияси ва Туркия Республикаси Олий сайлов кенгаши ўртасида ҳамкорлик меморандумини имзолашга бағишланган тадбир бўлиб ўтди.
МСК матбуот хизматининг хабар беришича, икки мамлакат олий сайлов органлари ўртасида имзоланган меморандумда томонларнинг сайловларга тайёргарлик кўриш ва ўтказиш амалиётини янада такомиллаштириш, сайлов жараёнларига замонавий ахборот технологияларини кенг жорий этиш, кадрларнинг малакасини ошириш каби йўналишлар бўйича ўзаро ҳамкорлиги кўзда тутилган.
Жорий йилнинг 22 декабрь куни бўлиб ўтадиган Олий Мажлис Қонунчилик палатаси ва маҳаллий кенгашларга сайловларни умумеътироф этилган халқаро сайлов стандартларига биноан кўппартиявийлик, муқобиллик ва очиқ-ошкора ўтказиш юзасидан изчил ишлар амалга оширилмоқда. Бунда янгиланган миллий сайлов қонунчилиги муҳим аҳамият касб этмоқда.
Жумладан, Ўзбекистоннинг хорижда истиқомат қилаётган барча фуқаролари учун овоз бериш имкониятининг яратилгани миллий сайлов тизимидаги ана шундай муҳим янгиликлардандир. Авваллари бундай сиёсий тадбирда фақат консуллик ваколатхоналаридан расман рўйхатдан ўтган ўзбекистонликлар ўзларининг конституциявий ҳуқуқларидан фойдаланган.
Энди чет элда вақтинча ёки доимий яшаётган Ўзбекистоннинг барча фуқаролари 40 га яқин мамлакатда ташкил этилган эллик бешта сайлов участкасида овоз бериши мумкин. Бундай сайлов участкалари Туркияда ҳам очилди.
Хабарда айтилишича, Туркия Олий сайлов кенгаши раиси Сади Гювен ўз тараққиётининг янги, демократик босқичига қадам қўйган Ўзбекистонда амалга оширилётган улкан ўзгаришларни Туркия аҳли катта қизиқиш ва ҳайрихоҳлик билан кузатиб турганини таъкидлади. Барча соҳалар ривожида очиқлик, ошкоралик, демократия тамойилларига улкан эътибор қаратилаётгани келаётган якшанба куни ўтажак сайловларда ҳам ўз ифодасини топишига ишонч билдирди.
Шунингдек, Олий Мажлис Қонунчилик палатасига бўлажак сайловда халқаро кузатувчи сифатида иштирок этиш борасидаги таклифи учун Ўзбекистон томонига миннатдорлик билдирган.
Изоҳ (0)