«Дарё» интернет нашри фотомухбири Мадина Нурман «Таҳсин» танловининг «Оммавий ахборот воситалари соҳасидаги фаоллиги учун» номинацияси бўйича тақдирланди.
Ёшлар иттифоқи томонидан ташкил этилган «Таҳсин» мукофотининг тақдирлаш маросими «Ёшлар ижод саройи»да ўтказилди.
Тадбирда давлат ва жамоат арбоблари, вазирлик, идора ва муассасаларнинг мутасадди раҳбарлари, Ўзбекистон Ёшлар иттифоқи етакчилари, фаол ёшлар ҳамда оммавий ахборот воситалари вакиллари иштирок этди.
Танловга ноябрь ойи давомида вазирлик, идора ва ташкилотлар томонидан давлат ва жамият бошқаруви, иқтисодиёт ва қишлоқ хўжалиги, фан-таълим, ижтимоий соҳа, санъат, маданият, журналистика ҳамда спорт соҳаларидаги 22 та номинация бўйича 500 нафар номзод тавсия этилган эди.
«Таҳсин» мукофоти ғолибларини тантанали тақдирлаш маросимини Олий Мажлис Сенати раиси Танзила Нарбаева очиб берди. Илк мукофотни «Қуролли Кучлар соҳасида Ўзбекистон нуфузини оширишга қўшган муносиб ҳиссаси учун» номинацияси бўйича Навоий вилояти ДХХ Чегара қўшинларидаги Ўзбекистон ёшлар иттифоқи Етакчилар Кенгаши раиси Зумрад Тўраева ва Мудофаа вазирлигининг халқаро «Армия—2019» танловида ғолиб бўлган танкчилар экипажи қўлга киритди.
«Ўзбек тилида масофавий таълим олиш имкониятлари ривожига қўшган ҳиссаси учун» номинациясига «Хан Академияси» муносиб топилди.
«Илм-фан соҳасини ривожлантиришдаги кучли иродаси ва матонати учун» мукофотини Ўзбекистон Республикаси Халқ таълими вазири Шерзод Шерматов ҳамда Ўзбекистон Ёшлар иттифоқи қошидаги «Имконияти чекланган болалар ва ёшлар маркази» директори Раъно Шодиева топширди. Мазкур номинацияда кўзи ожизлар учун брайл алифбосидаги инглиз тилидаги илк ўқув қўлланмани яратишда ҳисса қўшган Хуршид Тошев ғолиб бўлди.
«Санъат соҳасидаги иқтидори учун» номинацияси бўйича кўзи ожизлар мусиқа мактаби ўқитувчиси, халқаро танлов ғолиби, пианиночи Севара Мирсиддиқова ғалаба қозонди.
«Ахборот коммуникация технологиялари соҳасидаги ташаббускорлиги учун» Шоҳижаҳон Деҳқоновга мукофотни Муҳаммад ал-Хоразмий номидаги Ахборот-коммуникация технологияларига ихтисослаштирилган мактаб директори, Инҳа университети бош менежери Ҳилола Умарова топширди.
Атроф-муҳит озодалигини таъминлашдаги ташаббускорлиги учун» номинациясида Hashar week лойиҳаси асосчиси Суна Пак ва Жарқўрғонда ўрмонзор яратган Намоз Жумаев зафар қучди. Уларни Smartgov Consulting ташкилоти раҳбари, блогер Азиза Умарова ва блогер Никита Макаренко тақдирлади.
«Ҳайкалтарошлик йўналиши ривожидаги ташаббуси учун» Баҳром Норбоев, «Китобхонликни ривожлантиришдаги ташаббуси учун» Asaxiy books асосчиси Фируз Аллаев, «Оммавий ахборот воситалари соҳасидаги фаоллиги учун» номинацияларида «Дарё» фотомухбири Мадина Нурманова ғолибга айланди. Журналист Бахтиёр Насимов, «Ёш китобхон» танлови ғолиби, «Чегарасиз» лойиҳаси қаҳрамони Маҳлиё Ўроқова ҳамда блогер Дима Қаюм совриндорларга муваффақият тилади.
«Мамлакат спорт имижини кўтаришда қўшган ҳиссаси учун» номинацияси бўйича мукофотни футболчи Элдор Шомуродов ва оғир атлетикачи Кумуш Файзуллаева қўлга киритди. Гимнастика бўйича жаҳон чемпиони Оксана Чусовитина ва Спорт шархловчиси Мирзаҳаким Тўхтамирзаев спортчиларни самимий қутлади.
«Болалар ва ёшлар ўртасида волонтёрлик ҳаракати ривожига қўшган ҳиссаси учун» номинацияси бўйича мукофот Ўзбекистон Республикаси Олий Мажлиси депутати Иброҳим Ҳожиев ва эксперт Дилфуза Қуролова томонидан Жиззах вилояти вакили, 2018/2019-ўқув йилида Республика «Камалак» болалар ташкилоти сардори Дилшод Шарофов ва Тошкент шаҳри «Время Чудес» волонтёрлик ҳаракати асосчиси Ширин Абидовага топширилди.
«Тадбиркорлик йўналишида кўрсатган ташаббуси учун» Тошкент шаҳри Навоий вилоятида ҳўл ва қуруқ мевалар экспорти билан шуғулланувчи Teodora Goods ҳамда Teodora Grupp МЧЖлари раҳбари Дилдора Атажонова ва MFaktor лойиҳаси асосчилари Ҳасан ва Ҳусан Мамасаидовлар тақдирланди. MFaktor лойиҳаси асосчилари тақдим этилган 10 миллион сўм миқдоридаги мукофот пулини блогер Дима Қаюм кутубхонаси равнақи учун совға қилди.
«Юксак меҳр ва эътибор учун» йўналишида Тошкент шаҳри «Меҳрли қўллар» лойиҳаси муаллифи Баҳром Алиев, «Меҳрибон юрак» акциясида юрак хасталигига чалинган, жарроҳлик амалиётига зарурати бўлган, ижтимоий ҳимояга муҳтож, оилавий шароити оғир бўлган 14 нафар болага беғараз жарроҳлик амалиётини ўтказган бош шифокор Мурод Аҳмедов, «Ёшлар» телеканалида «7-қадам» хайрия лойиҳаси муаллифи Ҳамза Жумаев ҳамда «Kun.uz» интернет нашри хайрия лойиҳаси асосчилари эътироф этилди.
«Юксак инсонийлик, мардлик ва жасорати учун» номинациясига Оламафрўз Абдуллаев муносиб топилди. Мукофотни Ўзбекистон Ёшлар иттифоқи Марказий Кенгаши раиси Алишер Саъдуллаев топширди. Оламафрўз Россия федерациясининг Челябинск вилояти Магнитогорск шаҳрида юз берган бахтсиз ҳодисада ўз ҳаётини хавф остига қўйиб 8 нафар инсонни биринчилардан бўлиб қутқарган. Ушбу қаҳрамонлиги учун Челябинск вилояти томонидан «Спешите делат добро» медали билан тақдирланган.
Танлов ғолибларининг ҳар бири 10 миллион сўмдан пул мукофоти, статуэтка ҳамда қимматбаҳо совғалар билан тақдирланди.
Изоҳ (0)