Жорий йилнинг ўтган 11 ойи мобайнида спиртли ичимликларга ружу қўйган 3 нафар вояга етмаган шахс Соғлиқни сақлаш вазирлиги тизимидаги даволаш профилактика муассасаларига даволаниш учун юборилди. 4 700 нафар ўқувчининг таълим масканига бормай, назоратсиз юрганлиги аниқланиб, улар билан якка тартибда профилактик ишлар олиб борилди. Бу ҳақда 16 декабрь, душанба куни Ахборот ва оммавий коммуникациялар агентлигида бўлиб ўтган брифингда ИИВ расмийси маълум қилди, дея хабар бермоқда «Дарё» мухбири.
Қайд этилишича, вояга етмаган фарзандига таълим-тарбия бериш борасидаги мажбуриятини бажармаган 5 минг нафардан зиёд ота-она маъмурий жавобгарликка тортилган ҳамда уларнинг ҳар бирига энг кам ойлик иш ҳақининг бир баравари миқдорида жарима қўлланилган.
«Вояга етмаганлар орасида тамаки маҳсулотлари ва спиртли ичимликлар ноқонуний сотилишининг олдини олиш юзасидан профилактик тадбирлар» мавзусидаги матбуот анжуманида қайд этилишича, жорий йилнинг ўтган даври мобайнида Ўзбекистонда Маъмурий жавобгарлик тўғрисидаги кодекснинг 187-моддаси (жамоат жойларида алкоголь маҳсулотини истеъмол қилиш) бўйича 119 мингдан ортиқ маъмурий ҳуқуқбузарлик ҳолати кузатилган. Натижада 3 миллиард сўмдан ортиқ жарима ундирилган.
Маъмурий жавобгарлик тўғрисидаги кодекснинг 56-1-моддаси (жамоат жойларида тамаки маҳсулотини истеъмол қилиш)га асосан эса 145 мингдан ортиқ маъмурий ҳуқуқбузарлик содир этилган ҳамда 5 миллиард сўмга яқин маблағ жарима қилинган.
«Таълим, спорт ва диний муассасалардан 200 метрдан кам радиусда алкоголь ва тамаки маҳсулотлари сотишни йўлга қўйган савдо дўконлари 3744 марта огоҳлантирилган. Кейинроқ уларнинг лицензиясини тўхтатиш бўйича маҳаллий ҳокимликларга тақдимномалар киритилган ҳамда лицензиялари вақтинчалик тўхтатилган. Шундан 2790 таси мактаб, 66 таси академик лицей, 429 таси касб-ҳунар коллежлари ва 459 таси масжидлар атрофидаги савдо шохобчаларига тўғри келган», — деди ИИВ Ҳуқуқбузарлик профилактикаси бош бошқармаси бошлиғи Бахтиёр Бердиалиев.
Изоҳ (0)