Ўзбекистон Мудофаа вазирлиги ҳарбий хизматчилари АҚШ ҳарбий хизматчилари (Миссисипи, АҚШ) ўртасида ҳар йили анъанавий равишда ўтказиладиган «Энг яхши жангчи» ҳарбий танловида иштирок этиб, ўз тоифаларида 1-ўринни қўлга киритди. Бу ҳақда вазирликнинг Ахборот ва оммавий коммуникациялар департаменти «Дарё»га маълум қилди.
Ушбу мусобақада Ўзбекистон Мудофаа вазирлиги вакиллари сержант Сардор Мамарасулов ва кичик сержант Муҳриддин Очилов биринчи маротаба иштирок этиб, Миссисипи Миллий гвардиясининг турли бўлинмаларидан қатнашган 14 нафар сержант билан баҳслашиб, билим ва маҳоратларини намойиш этди.
Мусобақа Миссисипи штати Миллий гвардияси ташкил этилганлигининг 338 йиллиги муносабати билан ўтказилди.
Мусобақанинг биринчи кунида иштирокчилар 9 элементдан иборат тўсиқ чизиқларини босиб ўтди. Кейинги босқичда Ўзбекистон Мудофаа вазирлиги ҳарбий хизматчилари жисмоний тайёргарлик бўйича синов имтиҳонларини топширди. Унда ерга таянган ҳолатда машқ бажариш, пресс, 3,2 километрга югуриш, 110 килограмм оғирликдаги штангани турган ҳолатда кўтариш, 5 килограмм оғирликдаги тўпни улоқтириш, турникда тортилиш, қисқа масофага югуриш (25 метр) кабилар бўйича ўз жисмоний қобилиятларини намойиш қилди.
Навбатдаги босқичда Ўзбекистон Мудофаа вазирлигининг кичик мутахассислари Америка армияси қуроллари – Beretta тўппончаси, М-4 автомати, М-240 қўл пулемёти, М-249 оғир автомати ва автоматик миномётларни қисмларга ажратиб-йиғиш шартини ҳам муваффақиятли бажарди. Бундан ташқари ўзбек ҳарбийлари замонавий манекенлардан фойдаланган ҳолда, жароҳатлар ва шикастланишларда биринчи тиббий ёрдам кўрсатиш бўйича ҳам синовлардан муваффақиятли ўтди.
«20 километрга марш юриш ва турли хил қуроллардан нишонларга отиш, шунингдек, қўл гранаталарини улоқтириш шартларида ҳам Ўзбекистон Мудофаа вазирлиги ҳарбий хизматчилари юқори жанговар тайёргарлик ва касбий маҳоратга эга эканликларини яна бир бор намойиш этди», — дейилади хабарда.
Якуний натижаларга кўра, «Энг яхши жангчи» мусобақасида Ўзбекистон Мудофаа вазирлиги вакиллари — катта сержант Сардор Мамарасулов ва кичик сержант Муҳриддин Очилов ўз тоифаларида 1-ўринни эгаллади.
Изоҳ (0)