Ўзбекистон Президентининг «Ёғоч-қириндили плиталар ҳамда уларнинг муқобил турларини ишлаб чиқаришни янада ривожлантириш, импортни қисқартириш бўйича қўшимча чора-тадбирлари тўғрисида»ги қарор лойиҳаси жамоатчилик муҳокамасидан олинди. Бу ҳақда «Дарё»нинг ҳукуматдаги манбалари хабар берди.
Хабар берилишича, қарор лойиҳаси жамоатчилик фикри ва тадбиркорларнинг таклифлари ўрганиб чиқилганидан кейин муҳокамадан олинган. Мамлакатда фаолият олиб бораётган корхоналарнинг ДСП ишлаб чиқариш бўйича қувватлари ички бозордаги мазкур маҳсулотга бўлган талабни қодиришга етарли эмаслиги қайд этилган.
Мазкур қарор лойиҳаси ноябрь ойи охирида жамоатчилик муҳокамаси учун эълон қилинганди. Қарор лойиҳасида 2020 йил 1 январдан бошлаб ёғоч-қириндили плиталар (ДСП) ҳамда уларнинг муқобил турлари импортига 1 метр куб қатъий 25 доллар ҳамда 2021 йил 1 январдан бошлаб қатъий 30 доллар миқдорида акциз жорий этиш таклиф қилинган эди.
Ўзбекистон мебель ва ёғочни қайта ишлаш саноати ассоциацияси эса мазкур таклифга қарши чиқди. Ассоциация вакилларига кўра, акциз жорий этилган тақдирда Ўзбекистонда мебель маҳсулотлари қимматлаши, ишлаб чиқарувчилар камайиши, минглаб иш ўринлари қисқариши, аҳолининг маълум бир табақалари мебель сотиб олишга қурби етмаслиги ва тайёр мебелга акциз ўрнатилмагани сабабли бозорни импорт маҳсулоти эгаллашига олиб келиши мумкин.
Шунингдек, Монополияга қарши курашиш қўмитаси ҳам мазкур таклифга қарши чиққан эди.
Изоҳ (0)