Фарғона вилояти ҳокимлиги ахборот хизмати «Озодлик» канали томонидан тарқатилган «Фарғона ҳокими блогернинг ‘жанозасини ўқиш’ни буюрди» сарлавҳали мақола юзасидан баёнот берди.
Баёнотда, жумладан, шундай дейилади:
«Озодлик» Фарғона вилояти ҳокими Шуҳрат Ғаниевга нисбатан навбатдаги туҳматини эълон қилган. 2 декабрда айтилган деб иддао қилинаётган аудио ёзувдаги овози ўхшатилган сўзлар бирон бир селектор йиғилишида Ш.Ғаниев томонидан айтилмаган. Ш.Ғаниев журналист ёки блогерларга нисбатан босим ёки тазйиқ ўтказмаган, Қува тумани ҳокимига бу ҳақда ҳеч қачон танбеҳ бермаган.
Аудио ёзув ўхшатма овознинг қўпол монтажидан бошқа нарса эмас.
Ҳурматли интернет фойдаланувчилари, ҳамкасб журналистлар, блогерлар! «Озодлик»нинг ўйинига учманг, унинг туҳматларига ишонманг. Агар «Озодлик»да бундай ҳақиқий овоз бўлганида эди, у ўзи иддао қилишича 2 декабрдан буён уни ушлаб турмас эди.
«Озодлик»нинг куни энди пранкер (овоз ўхшатувчи)ларга қолган кўринади».
Маълумот учун, «Озодлик» канали 14 декабрь, шанба куни Фарғона вилояти ҳокими Шуҳрат Ғаниевнинг овози деб айтилаётган аудиоматериални эълон қилди. Унда билдирилишича, Ғаниев 2 декабрь куни ўтказилган селектор йиғилишида Қувада газ йўқлигига норозилик билдириб, автомобиль йўлини тўсиш воқеасини ижтимоий тармоққа қўйган шахснинг «жанозаси ўқилмагани» учун Қува тумани ҳокимини тергаган.
Изоҳ (0)