Farg‘ona viloyati hokimligi axborot xizmati “Ozodlik” kanali tomonidan tarqatilgan “Farg‘ona hokimi blogerning ‘janozasini o‘qish’ni buyurdi” sarlavhali maqola yuzasidan bayonot berdi.
Bayonotda, jumladan, shunday deyiladi:
“Ozodlik” Farg‘ona viloyati hokimi Shuhrat G‘aniyevga nisbatan navbatdagi tuhmatini e’lon qilgan. 2-dekabrda aytilgan deb iddao qilinayotgan audio yozuvdagi ovozi o‘xshatilgan so‘zlar biron bir selektor yig‘ilishida Sh.G‘aniyev tomonidan aytilmagan. Sh.G‘aniyev jurnalist yoki blogerlarga nisbatan bosim yoki tazyiq o‘tkazmagan, Quva tumani hokimiga bu haqda hech qachon tanbeh bermagan.
Audio yozuv o‘xshatma ovozning qo‘pol montajidan boshqa narsa emas.
Hurmatli internet foydalanuvchilari, hamkasb jurnalistlar, blogerlar! “Ozodlik”ning o‘yiniga uchmang, uning tuhmatlariga ishonmang. Agar “Ozodlik”da bunday haqiqiy ovoz bo‘lganida edi, u o‘zi iddao qilishicha 2-dekabrdan buyon uni ushlab turmas edi.
“Ozodlik”ning kuni endi pranker (ovoz o‘xshatuvchi)larga qolgan ko‘rinadi”.
Ma’lumot uchun, “Ozodlik” kanali 14-dekabr, shanba kuni Farg‘ona viloyati hokimi Shuhrat G‘aniyevning ovozi deb aytilayotgan audiomaterialni e’lon qildi. Unda bildirilishicha, G‘aniyev 2-dekabr kuni o‘tkazilgan selektor yig‘ilishida Quvada gaz yo‘qligiga norozilik bildirib, avtomobil yo‘lini to‘sish voqeasini ijtimoiy tarmoqqa qo‘ygan shaxsning “janozasi o‘qilmagani” uchun Quva tumani hokimini tergagan.
Izoh (0)