Чироқчида 95 ёшни қаршилаётган онахонга биометрик паспорт берилди
Қашқадарё вилоятининг Чироқчи туманида яшовчи 95 ёшни қаршилаётган онахон — Руяб Боллиева биометрик паспорт олди. Бу ҳақда «Дарё»га туман ҳокимлиги ахборот хизмати раҳбари Собит Раимқулов маълум қилмоқда.
Хабарда айтилишича, 1925 йил туғилган онахон 15 декабрь, якшанба куни биометрик паспорт олиш ниятида туман фуқароликни расмийлаштириш бўлинмасига борган.
— Фарзандларим янги паспорт олиб бериш учун олиб келишди, — дейди 95 ёшли онахон Руяб Боллиева. — Ҳатто дам олиш куни бўлса-да «паспорт стол» ходимлари менинг мушкулимни осон қилишди. Мен янги паспорт олдим.
— 2019 йил давомида туманда 40 мингдан ортиқ фуқарога биометрик паспорт берилди, — дейди бўлинма бошлиғи, майор Маҳмадиёр Жўраев. — Шу кунгача 500 дан ортиқ фуқаро хонадонига бориб хизмат кўрсатилди ва фуқаролик паспорти етказиб берилди.
Қашқадарё ИИБ Миграция ва фуқароликни расмийлаштириш бошқармаси катта инспектори Фаёз Қурбоновнинг маълумот беришича, вилоятда айни кунга қадар 2 миллион 165 минг 515 нафар киши биометрик паспорт олган. Бу — аҳолини биометрик паспорт билан таъминлаш 99,7 фоизга етганини кўрсатади.
Айтилишича, вилоятда фуқаролик паспортини алмаштиришга угурмаган 6813 нафар кишига 2019 йил 20 декабрга қадар янги паспорт берилиши режалаштирилган.
Эслатиб ўтамиз, айни кунга қадар фойдаланилиб келинаётган нобиометрик паспортлар 2019 йил 31 декабрь кунига қадар ҳақиқий ҳисобланади.
