13 декабрь, жума куни Коррупцияга қарши курашиш бўйича республика идоралараро комиссияси томонидан 9 декабрь — Халқаро коррупцияга қарши кураш кунига бағишланган «Ўзбекистон Республикасида коррупцияга қарши курашиш ислоҳотлари: ютуқлар ва устувор вазифалар» мавзусида халқаро медиа-форум ўтказилди. Бу ҳақда Бош прокуратура хабар берди.
Тадбир БМТ Тараққиёт дастурининг «Ўзбекистонда самарали, ҳисоб берувчи ва ошкора бошқарув институтлари орқали коррупцияга қарши курашиш» лойиҳаси билан ҳамкорликда ташкил этилди.
Тадбирда Бош прокуратура, Адлия вазирлиги ва бошқа қатор вазирлик ва идораларнинг масъул ходимлари, фуқаролик жамияти институтлари, оммавий ахборот воситалари вакиллари ҳамда халқаро экспертлар иштирок этди.
Шунингдек, мазкур тадбирда бош прокурор ўринбосари Эркин Йўлдошев иштирок этди ва нутқ сўзлади.
Бош прокурор ўринбосари ўз нутқида сўнгги йилларда Ўзбекистонда беш йиллик ривожланиш Стратегияси асосида коррупцияга қарши курашиш самарадорлигини қонунчилик ва институционал даражада ошириш бўйича жиддий чоралар кўрилганлигини қайд этиб ўтди.
Бундан ташқари, Эркин Йўлдошев ўз нутқида Коррупцияга қарши курашиш бўйича республика идоралараро комиссияси ишчи органи сифатида Бош прокуратура томонидан бу борада муҳим ислоҳотлар амалга оширилаётганлигини таъкидлаб ўтди.
Хусусан, Иқтисодий ҳамкорлик ва тараққиёт ташкилотининг коррупцияга қарши курашиш бўйича Истанбул ҳаракатлар режаси мониторингнинг тўртинчи босқичи натижаларига кўра, халқаро экспертлар Ўзбекистон ушбу ташкилотнинг аввалги барча тавсиялари бўйича ютуқларга эришганлигини эътироф этган.
Форумда иштирокчиларга коррупцияга қарши курашиш борасида жорий йил давомида амалга оширилган ишлар, эришилган ютуқ ва камчиликлар, халқаро ва минтақавий ташкилотлар билан ҳамкорликда амалга оширилган ишлар бўйича маълумотлар берилди.
Шунингдек, Бош прокуратура томонидан Коррупцияга қарши курашиш бўйича республика идоралараро комиссиясининг веб-сайти, фуқароларга коррупция фактлари тўғрисида давлат органларини хабардор қилиш имконини берувчи мобиль илова, давлат органларида коррупцияга қарши курашиш бўйича амалга оширилган ишларни мониторинг қилиш ва баҳолаш бўйича электрон ахборот тизими ишга туширилаётганлиги ҳақида тўхталиб ўтилди.
Форум якунида иштирокчилар томонидан республикада коррупцияга қарши курашиш, фуқаролар ва тадбиркорларнинг ҳуқуқ ва эркинликлари ҳимоя қилиш бўйича кенг кўламли ишлар амалга оширилганлиги, бу борада халқаро ташкилотлар, давлат органлари ва фуқаролик жамиятлари институтлари ҳамкорлигини янада кучайтириш лозимлиги қайд этилди.
Изоҳ (0)