Ўзбекистон Президенти «Айрим қонун ҳужжатларига ўзгартиш ва қўшимчалар киритиш тўғрисида»ги қонунни имзолади. Бу ҳақда Адлия вазирлигининг «Ҳуқуқий ахборот» Telegram канали хабар берди.
Қонунга мувофиқ, тадбиркорлик субъектларини тугатиш тартиби такомиллаштирилиши муносабати билан бир қатор қонун ҳужжатларига тегишли ўзгартишлар киритилди.
Жумладан, Фуқаролик кодексига киритилган ўзгартишга кўра, юридик шахс молия-хўжалик фаолияти амалга оширилмаганлиги сабабли ҳаракатсиз режимга ўтказилган пайтдан бошлаб уч йил ичида фаолият тикланмаган тақдирда рўйхатдан ўтказувчи органнинг қарорига кўра тугатилиши мумкин (ННТлар бундан мустасно).
Амалдаги тартибга кўра, юридик шахс олти ой мобайнида (савдо ва савдо-воситачилик корхонаси эса 3 ой мобайнида) молия-хўжалик фаолиятини амалга оширмаган ва (ёки) давлат рўйхатидан ўтказилган пайтдан бошлаб бир йил ичида устав фондини шакллантирмаган бўлса, суднинг қарорига мувофиқ тугатилади.
Шунингдек, янги тартибга кўра, юридик шахс бўлган тадбиркорлик субъектини ихтиёрий равишда тугатиш тўғрисидаги эълон рўйхатдан ўтказувчи орган томонидан унинг расмий веб-сайтига жойлаштирилади. Амалдаги кодексда ушбу талаб назарда тутилмаган.
Ушбу қонун 2020 йил 1 январдан эътиборан кучга киради.
Изоҳ (0)