Ўзбекистон Марказий банки жисмоний шахслардан ўз мулкини (кўчмас мулк ёки автомобиль) сотишдан тушган пул маблағларини, дивиденд ёки гонорарларни ўзларининг банк карталари ва депозит ҳисобварақлари орқали олиш тартиби юзасидан мурожаатларга жавоб берди.
Маълум қилинишича, жисмоний шахслар хусусий мулкини сотишдан тушган пул маблағларини, шунингдек, дивидендлар, ижодий фаолиятидан олинган гонорарлар ва қонунчиликда тақиқланмаган бошқа тушумларини ўзларининг банк карталари ва депозит ҳисобварақларига чекловларсиз олиш ҳуқуқига эга.
Мулк олди-сотди шартномасини тузишда, шунингдек, дивиденд ва бошқа қонуний тўловларни олишда, тўловни амалга оширувчи томонга маблағ олувчининг банк картаси ёки депозит ҳисобварағининг банк реквизитларини тақдим этиш зарур, уларни хизмат кўрсатувчи банкдан олиш мумкин.
Банкларнинг мобил иловаларидан ёки тўлов ташкилотларининг (Payme, Click, Paynet ва бошқалар) хизматларидан фойдаланганда, тўловчига маблағ олувчининг банк картаси рақамини беришнинг ўзи кифоя.
Агар банк картаси SMS орқали хабар бериш хизматига уланган бўлса, у ҳолда банк картаси эгаси мобиль телефон орқали SMS-хабарнома ёки Telegram бот орқали унинг банк картасига маблағ тушганлиги ҳақида маълумот олиши мумкин.
Қайд этилишича, банклар жисмоний шахсларнинг банк карталари ёки депозит ҳисобварақларига маблағларни кирим қилганлиги учун воситачилик ҳақи ундиришга ҳақли эмас.
Изоҳ (0)