Таниқли инсонларнинг фарзандларига ҳар доим оғир бўлган — бундай оилада туғилиш бир томондан катта омад бўлса, бошқа томондан олиб қаралганда кейинчалик ҳаётни бутунлай ўзгартириб юбориши мумкин бўлган ҳодиса. ХХ асрнинг энг қаҳри қаттиқ диктаторлари фарзандларининг тақдири қандай кечгани ҳақида ҳикоя қиламиз.
Яков Жугашвили, Иосиф Сталиннинг ўғли
Екатерина Сванидзе – Иосиф Сталиннинг биринчи хотини ҳисобланади ва 1907 йилда у ўғли туғилганидан олти ой ўтиб, тиф касаллиги туфайли вафот этган. Яков отаси бор бўлишига қарамай етимдек улғайган. Сталин партия ишлари бўйича сафарларда юрган ва ўғлига фақат моддий кўмак берган. Бола тарбияси билан унинг онаси томонидан қариндошлари шуғулланган.
Яков 15 ёшга тўлгач, отаси уни тоғли грузин қишлоғидан Москвага олиб келади. Пойтахтда яшаш йигитга осон бўлмайди. Рус тилида деярли гапирмайдиган одамнинг бегона муҳитга кўникиши қийин кечган, ўспирин ҳатто уйида ҳам ўзини эркин ҳис эта олмаган. Сталин ўғли билан жуда совуқ оҳангда гаплашар унга болам деб мурожаат қилмас, кичик хато учун ҳам аёвсиз жазоларди. Ушбу йўл билан диктатор ўғлининг феъл-атворини шакллантиришга уринган бўлиши мумкин.
Бундай ҳаёт тарзи Яковни ўз жонига қасд қилишигача олиб борди. Йигит шифохонага тушиб қолди, отаси унинг ҳолидан умуман хабар олмади. Иккинчи хотинига ёзган хатида эса «Яшага менинг номимдан у ўзини безори ва шантажчилардек тутганини ва мен бундайлар билан мулоқот қилмаслигимни айтиб қўй», дея вазиятга муносабат билдирган. Кейинчалик ота-бола муносабатлари яна яхшиланиб кетган.
Иккинчи жаҳон уруши даврида артиллерия академиясини тамомлаган Яков ҳам фронтга чақирилди. Урушга кетиш олдидан отаси билан қўнғироқлашган йигит Сталиндан қисқагина «Бор ва жанг қил!» деган гапни эшитган. Орадан уч ҳафта ўтгач Яков асирликка тушади. Немислар унинг исмини мафкуравий ҳужумлар учун ишлатарди. Сталин ўғлини асирга тушган немис зобитларига алмашитиришни истамади, 1943 йилда Яков Заксенхаузендаги концлагерда ҳалок бўлди. У катта кучланишдаги электр токи уланган сим тўсиққа ўзини ташлаган.
Кармен Франко, Франсиско Франконинг қизи
Франсиско Франко қизи Кармен дунёга келган вақтда жуда хурсанд бўлган. Диктатор қизига бутун Испания халқига қилгани каби қаттиққўл муносабатда бўлмаган. Франко қизни ҳақиқий кибор хоним қилиб ўстиришга уринган. Ҳарбий ишлардан бўш вақтини ҳамиша Кармен билан ўтказган.
Диктатор бир масалада ҳаддан зиёд юмшоқлик қилган. Гарчи Франко қизига ўзи муносиб эр топишни истаган бўлса ҳам Кармен кардиожарроҳ Мартинес Бордюни танлаганидан унинг қарорига ҳурмат билан муносабатда бўлган. Икки ёшнинг тўйи 1950 йилда жуда чиройли дабдаба билан ўтказилган.
Бир неча йил ўтгач, интервьюларнинг бирида Кармен гарчи отасини қаттиқ яхши кўрган бўлса ҳам унинг диктатор бўлгани ўзига ёқмаганини тан олган. Аёл доимо қўрқув исканжасида яшаган. У отасининг кўплаб душманлари бир кун эмас бир куни ўзи ва оиласига қонли ҳужум уюштиришидан хавотирланган. Франконинг ўзи ҳам қизини яшириб юрган ва Карменни Гитлер ўғирлаб кетиши мумкинлигидан қўрққан.
Эдда Муссолини, Бенито Муссолинининг қизи
Бенито Муссолинининг қизи яҳудий йигитга турмушга чиққан вақтида отасининг фотиҳасини олмаган. Кейинчалик 1930 йилда ота-онасининг қистови билан Муссолининг иттифоқдоши граф Галеацсо Чианога эрга тегган.
14 йил оила бўлиб бирга яшаган жуфтлик бу вақт давомида тўрт нафар фарзанднинг ота-онаси бўлган. Улар бир-бирини қаттиқ севган, Чиано Муссолини томонидан фашистлар ҳукуматига қарши чиққани учун отишга ҳукм қилинган. Эдда отасига қанчалик ялиниб ёлвормасин, Муссолини ўз куёвининг қатл қилинишини Гитлер билан бирга совуққон нигоҳ остида кузатган. Ушбу фожиадан таъсирланган Эдда ота-онасидан қочиб Швейцарияда қўним топган.
Уруш поёнига етгач, ватан соғинчи Эддани Италияга қайтарди. Мамлакатга қайтганидан кейин аёл фашистлар ҳукумати билан тил бириктирганликда айбланиб қамоққа олинди. Эдда барини инкор қилди, лекин барибир икки йил сургунда яшади. Ҳаётининг қолган қисмини ўз томирларида оқаётган диктатор қони ҳақида иложи борича камроқ гапириб ўтказган.
Жан Мари Лоре, Гитлернинг никоҳсиз туғилган ўғли
Гитлер ва унинг рафиқаси Ева Брауннинг болалари бўлмаган. Бироқ Адолф оддий аскар бўлган вақтида Биринчи жаҳон уруши йиллари франциялик бир аёл билан учрашиб юргани ҳақида тахминлар мавжуд. Кейинчалик француз аёли Жан Мари исмли болакайни дунёга келтирган.
Иккинчи жаҳон уруши йилларида Жан Мари фашистлар Германиясига қарши аёвсиз жанг қилган ва ваҳший диктатор эмас, ўз отасига қарши курашаётганини билмаган. Ушбу сирни онаси ўлими олдидан ошкор этади. Айнан шу дақиқадан Жан Марининг ҳаёти остин-устин бўлиб кетди. У мудҳиш ҳақиқатни унутиш учун бор эътибори ва вақтини ишга сарфлади. Ҳақиқатдан воқиф бўлган Жан Марининг хотини ҳам у билан ажрашди.
Изоҳ (0)