Россиянинг Ярослав вилоятида жойлашган «Ярослав бройлер» паррандачилик фабрикаси ишчилари маошлар камлиги ва меҳнат шароитининг ёмонлиги сабаб иш ташлаш эълон қилиб, фабрикадан кетиб қолди, деб хабар беради «76.ru».
«Кечадан олдинги куни ойлик берилди, бироқ бу уларни қониқтирмади. Уларнинг айтишича, бу одатдагидан кам экан. Бошлиқнинг олдига келишди ва ‘ёқмаса, кетаверинглар’ деган жавобни олишди», — дейди фабрика ходимларидан бири.
Ишчилар бошлиқнинг айтганини қилиб, фабрикадан кета бошлаган. Маълумотларга кўра, ишчилар ўзлари учун иккита автобус буюртма қилиб, жўнаб қолишган. Ишлаб чиқариш тўхтаб қолмаслиги учун дам олаётган ишчилар ёрдамга чақирилган, ҳатто раҳбарият ҳам оддий ишчилар каби меҳнат қила бошлаган.
Бу каби режимда ишлаш ҳеч кимга ёқмагани сабаб завод ишчиларни қайтаришга уринган ва уларнинг ортидан қувган.
«Соат 07:30 ларга яқин ЙХҲБ ходимлари ичида ўзбекистонлик муҳожирлар бўлган, Ярослав томон ҳаракатланаётган автобусни тўхтатишган. Ходимлар автобус ва йўловчиларнинг ҳужжатларидан ҳеч қандай камчилик топмаган», — дейди Ярослав вилояти ИИББ ходими.
Инспекторлар Ўзбекистон фуқароларини қўйиб юборган. Бироқ фабрика раҳбарияти ишчиларни қайтаришга муваффақ бўлган. Раҳбарият бунга қандай қилиб эришгани номаълум.
Гап-сўзларга кўра, уларга етмаётган пуллари тўланган ва ойлик борасида бошқа алдамасликка ваъда беришган.
Изоҳ (0)