Туркманистоннинг Лебоб вилоятида Янги йил байрами икки кун — 30 ва 31 декабрь кунлари нишонланади. Тантаналарга тайёргарлик кўриш мақсадида бюджет ва давлат ташкилотлари ходимларининг ноябрдаги маошидан 30 манатдан ушлаб қолинмоқда. Бу ҳақда «Хроника Туркменистана» хабар берди.
Ишчиларнинг пуллари Туркманободдаги тўртта арчани безатиш ва бошқа безаклар учун ишлатилади.
Корхоналар ишчилар маошини банкларга ойнинг 16 ва 17-саналарида ўтказади. Банклар белгиланган маблағни индивидуал ҳисоб рақамларидан ечиб олади.
Ташкилотлар раҳбарлари ходимларнинг тўловдан бош тортиши давлат тадбирида қатнашишни инкор қилиш деб баҳолашини билдирган. Пул беришни истамаганлар ариза ёзиб ишдан бўшаши тавсия қилинган.
Лебобдаги асосий катта арча вилоят ҳокимлиги биноси рўпарасидаги Руҳият саройи яқинида ўрнатилади. 31 декабрь куни соат 18:00 дан Янги йил кириб келгунига қадар расмий табриклар йўлланади. Ушбу маросимга ҳар бир корхона ёки ташкилот муайян гуруҳдаги ходимларни юбориши лозим.
Яна бир катта арча Сайидий номидаги драма театри ҳовлисига ўрнатилади. У ердаги байрамлар 30 декабрда соат 17:00 дан 22:00 гача давом этади. Тантаналарга бюджет ташкилотлари ходимлари, талабалар ва юқори синф ўқувчилари жалб қилинади.
Ушбу байрамларда иштирок этадиган аёллар қизил ёки мовий рангдаги миллий либосда бўлиши лозим.
Изоҳ (0)