Россиянинг Санкт-Петербург шаҳрида оналик ҳуқуқидан маҳрум бўлган танишининг тарафини олмоқчи бўлган ўзбекистонлик 22 ёшли йигит 8 йилга қатъий тартибли колонияда қамоқ жазосини ўташга ҳукм қилинди. Ўзбекистонлик Шамсиддин Насриддинов танишининг ўғлидан ажралишида айбни унинг қўшниларига қўйган ва уларга ортиқча гапириб қўйгани учун дарс бермоқчи бўлган, бироқ бу қўшнилардан бирининг ўлими билан тугаган. Бу ҳақда «Fontanka.ru» хабар берди.
Маълум бўлишича, Шамсиддин Насриддинов 2018 йилнинг июль ойида бир неча ўртоғи билан танишининг қўшнилари уйига кирган ва уларни дўппослаган. Оқибатда қўшнилардан бири мушт, оёқ ва ёғоч бўлаги билан берилган зарбалар оқибатида вафот этган, иккинчи қўшнининг эса қовурғалари ва бармоқлари синган.
Шамсиддиннинг икки ўртоғи — Ражабов ва Қурбонов жорий йилнинг май ойида 10 йиллик қамоқ жазосига ҳукм қилинган.
Аниқланишича, уларнинг таниши бўлган аёл 2017 йилда маст ҳолда ўзининг бир ёшли ўғлини молхонада узоқ вақт ёлғиз қолдириб кетган. Болани уйсиз кишилар кўриб қолган ва у болалар уйига жўнатилган.
Она боланинг тақдири билан қизиқмаган. Шу вақтга қадар аёл олти нафар фарзанд кўрган бўлиб, беш марта оналик ҳуқуқидан маҳрум қилинган. У тўққиз ойлик ахлоқ тузатиш ишларига ҳукм қилинган.
Изоҳ (0)