«Қашқадарё ҳудудий электр тармоқлари корхонаси» акциядорлик жамиятида коррупция – тараққиёт кушандаси мавзусида тадбир ўтказилди. Ушбу тадбир давомида коррупция билан боғлик ҳолатлар ва уларнинг салбий оқибатлари, қонунларимизда бундай жиноятларга йўл қўйган қонунбузарларга қандай жазо чоралари белгиланганлиги иштирокчиларга мисоллар орқали тушунтирилди.
Давлат органлари тизимида коррупцияга қарши ўз вақтида кескин чоралар кўрилмаса, давлат қанчалик ер ости ва ер усти бойликларига эга бўлмасин, у ижтимоий-иқтисодий инқирозга юз тутиши муқаррар. Ўтмишда ҳам бу иллатга қарши кураш олиб борилган. Соҳибқирон Амир Темур давлатида амалдорлар ишини тартибга солиш мақсадида вақти-вақти билан сўроқ, текшириш, тафтиш ва тергов ўтказилиб турилганлиги, ўз амалини суиистеъмол қилиш, порахўрлик, каби қилмишлар оғир жиноят ҳисобланганлиги ва қаттиқ жазоланганлиги тарихдан маълум. Юнон файласуфи Аристотелнинг «Ҳар қандай давлат тизимида қонунлар ва бошқа фармойишлар орқали ишни шундай ташкил қилиш керакки, унда мансабдор шахсларни ноқонуний йўл билан бойишига йўл қўймаслик лозим», деган сўзлари фикримизни тасдиқлайди.
Мамлакатимизда ҳам коррупцияга қарши фаол курашиш тизими яратилган. Чунки коррупцияга йўл очилиши давлатни инқирозга юз тутишига олиб келади ва халқнинг яшаш шароитини оғирлаштиради. Шундай экан, коррупция тараққиётни емирувчи иллат эканлигини кенг жамоатчиликка тарғиб қилиш бугунги кундаги муҳим масала ҳисобланади.
Ўзбекистон Республикасининг «Коррупцияга қарши курашиш тўғрисида»ги қонунида қуйидагилар белгиланган:
Коррупцияга қарши курашиш соҳасидаги давлат сиёсатининг асосий йўналишлари аҳолининг ҳуқуқий онги ва маданиятини юксалтириш, жамиятда коррупцияга нисбатан муросасиз муносабатни шакллантириш, давлат ва жамият ҳаётининг барча соҳаларида коррупциянинг олдини олишга доир чора-тадбирларни амалга ошириш белгиланган. Коррупцияга оид ҳуқуқбузарликларни ўз вақтида аниқлаш, уларга чек қўйиш,оқибатларини ҳамда имкон берувчи сабаблар ва шарт-шароитларни бартараф этиш, коррупцияга оид ҳуқуқбузарликларни содир этганлик учун жавобгарликнинг муқаррарлиги принципини таъминлашдан иборат.
Коррупцияга қарши курашиш бўйича фаолиятни бевосита Ўзбекистон Республикаси Бош прокуратураси, Ички ишлар вазирлиги, Адлия вазирлиги, Бош прокуратура ҳузуридаги Иқтисодий жиноятларга қарши курашиш департаменти ҳамда ушбу фаолиятни қонун ҳужжатларига мувофиқ бошқа давлат органлари ҳам амалга ошириши белгиланган.
Шунингдек, кейинги йилларда мамлакатимизда коррупцияга қарши курашиш соҳасида муҳим ташкилий-ҳуқуқий ислоҳотлар амалга оширилди. Аҳолининг ҳуқуқий онги ва ҳуқуқий маданиятини юксалтиришга, жамиятда коррупцияга муросасиз муносабатни шакллантиришга йўналтирилган тизимли чоралар кўрилди.
Ислоҳотларни амалга ошириш доирасида фуқароларнинг ҳуқуқ ва манфаатларини ҳимоя қилинишини, давлат ҳокимияти ва бошқаруви органлари фаолияти очиқлигини, жамоат ва парламент назоратини таъминлаш механизмлари такомиллаштирилди, шунингдек, ҳуқуқни муҳофаза қилиш ва суд органлари фаолиятининг ҳуқуқий асослари ислоҳ қилинди.
Шу билан бирга, иқтисодиётни янада ўстириш, халқ фаровонлигини ошириш, мамлакатда инвестиция муҳитини яхшилаш борасидаги стратегик вазифаларни ҳал этиш коррупцияга қарши курашиш соҳасида давлат сиёсатининг самарали амалга оширилишини таъминлаш ҳамда коррупция кўринишларининг сабаб ва шарт-шароитларини бартараф этиш бўйича янги тизимли чоралар кўрилишини тақозо қилмоқда.
Коррупцияга қарши курашиш тизими самарадорлигини ошириш, энг юқори даражадаги қулай ишбилармонлик муҳитини яратиш, мамлакатнинг халқаро майдондаги ижобий обрў-эътиборини ошириш мақсадида, шунингдек, 2017 — 2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясида белгиланган вазифаларга мувофиқ, Ўзбекистон Республикаси Президентининг 2019 йил 27 майдаги «Ўзбекистон Республикасида коррупцияга қарши курашиш тизимини янада такомиллаштириш чора-тадбирлари тўғрисида»ги 5729-сонли фармони қабул қилинди.
Санжар Қурбанов,
«Қашқадарё ҳудудий электр тармоқлари корхонаси» АЖ
Юридик хизмат бошлиғи
Реклама ҳуқуқи асосида.
Изоҳ (0)