“Qashqadaryo hududiy elektr tarmoqlari korxonasi” aksiyadorlik jamiyatida korrupsiya – taraqqiyot kushandasi mavzusida tadbir o‘tkazildi. Ushbu tadbir davomida korrupsiya bilan bog‘lik holatlar va ularning salbiy oqibatlari, qonunlarimizda bunday jinoyatlarga yo‘l qo‘ygan qonunbuzarlarga qanday jazo choralari belgilanganligi ishtirokchilarga misollar orqali tushuntirildi.
Davlat organlari tizimida korrupsiyaga qarshi o‘z vaqtida keskin choralar ko‘rilmasa, davlat qanchalik yer osti va yer usti boyliklariga ega bo‘lmasin, u ijtimoiy-iqtisodiy inqirozga yuz tutishi muqarrar. O‘tmishda ham bu illatga qarshi kurash olib borilgan. Sohibqiron Amir Temur davlatida amaldorlar ishini tartibga solish maqsadida vaqti-vaqti bilan so‘roq, tekshirish, taftish va tergov o‘tkazilib turilganligi, o‘z amalini suiiste’mol qilish, poraxo‘rlik, kabi qilmishlar og‘ir jinoyat hisoblanganligi va qattiq jazolanganligi tarixdan ma’lum. Yunon faylasufi Aristotelning “Har qanday davlat tizimida qonunlar va boshqa farmoyishlar orqali ishni shunday tashkil qilish kerakki, unda mansabdor shaxslarni noqonuniy yo‘l bilan boyishiga yo‘l qo‘ymaslik lozim”, degan so‘zlari fikrimizni tasdiqlaydi.
Mamlakatimizda ham korrupsiyaga qarshi faol kurashish tizimi yaratilgan. Chunki korrupsiyaga yo‘l ochilishi davlatni inqirozga yuz tutishiga olib keladi va xalqning yashash sharoitini og‘irlashtiradi. Shunday ekan, korrupsiya taraqqiyotni yemiruvchi illat ekanligini keng jamoatchilikka targ‘ib qilish bugungi kundagi muhim masala hisoblanadi.
O‘zbekiston Respublikasining “Korrupsiyaga qarshi kurashish to‘g‘risida”gi qonunida quyidagilar belgilangan:
Korrupsiyaga qarshi kurashish sohasidagi davlat siyosatining asosiy yo‘nalishlari aholining huquqiy ongi va madaniyatini yuksaltirish, jamiyatda korrupsiyaga nisbatan murosasiz munosabatni shakllantirish, davlat va jamiyat hayotining barcha sohalarida korrupsiyaning oldini olishga doir chora-tadbirlarni amalga oshirish belgilangan. Korrupsiyaga oid huquqbuzarliklarni o‘z vaqtida aniqlash, ularga chek qo‘yish,oqibatlarini hamda imkon beruvchi sabablar va shart-sharoitlarni bartaraf etish, korrupsiyaga oid huquqbuzarliklarni sodir etganlik uchun javobgarlikning muqarrarligi prinsipini ta’minlashdan iborat.
Korrupsiyaga qarshi kurashish bo‘yicha faoliyatni bevosita O‘zbekiston Respublikasi Bosh prokuraturasi, Ichki ishlar vazirligi, Adliya vazirligi, Bosh prokuratura huzuridagi Iqtisodiy jinoyatlarga qarshi kurashish departamenti hamda ushbu faoliyatni qonun hujjatlariga muvofiq boshqa davlat organlari ham amalga oshirishi belgilangan.
Shuningdek, keyingi yillarda mamlakatimizda korrupsiyaga qarshi kurashish sohasida muhim tashkiliy-huquqiy islohotlar amalga oshirildi. Aholining huquqiy ongi va huquqiy madaniyatini yuksaltirishga, jamiyatda korrupsiyaga murosasiz munosabatni shakllantirishga yo‘naltirilgan tizimli choralar ko‘rildi.
Islohotlarni amalga oshirish doirasida fuqarolarning huquq va manfaatlarini himoya qilinishini, davlat hokimiyati va boshqaruvi organlari faoliyati ochiqligini, jamoat va parlament nazoratini ta’minlash mexanizmlari takomillashtirildi, shuningdek, huquqni muhofaza qilish va sud organlari faoliyatining huquqiy asoslari isloh qilindi.
Shu bilan birga, iqtisodiyotni yanada o‘stirish, xalq farovonligini oshirish, mamlakatda investitsiya muhitini yaxshilash borasidagi strategik vazifalarni hal etish korrupsiyaga qarshi kurashish sohasida davlat siyosatining samarali amalga oshirilishini ta’minlash hamda korrupsiya ko‘rinishlarining sabab va shart-sharoitlarini bartaraf etish bo‘yicha yangi tizimli choralar ko‘rilishini taqozo qilmoqda.
Korrupsiyaga qarshi kurashish tizimi samaradorligini oshirish, eng yuqori darajadagi qulay ishbilarmonlik muhitini yaratish, mamlakatning xalqaro maydondagi ijobiy obro‘-e’tiborini oshirish maqsadida, shuningdek, 2017 — 2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasida belgilangan vazifalarga muvofiq, O‘zbekiston Respublikasi Prezidentining 2019-yil 27-maydagi “O‘zbekiston Respublikasida korrupsiyaga qarshi kurashish tizimini yanada takomillashtirish chora-tadbirlari to‘g‘risida”gi 5729-sonli farmoni qabul qilindi.
Sanjar Qurbanov,
“Qashqadaryo hududiy elektr tarmoqlari korxonasi” AJ
Yuridik xizmat boshlig‘i
Reklama huquqi asosida.
Izoh (0)