Ижтимоий тармоқларда Пастдарғом туманидаги бетон заводида электр энергиясидан ноқонуний фойдаланганлик ҳолатини аниқлаган МИБ ходимлари фаолиятига завод иш юритувчисидан то туман ҳокими ёрдамчисигача фаол қаршилик қилингани ҳақида хабарлар тарқалди.
Воқеа юзасидан МИБ билан боғланган «Xabar.uz»нинг маълум қилишича, бюро марказий аппарати матбуот хизмати бошлиғи Фаррух Тошпўлатов вазиятга қуйидагича ойдинлик киритган:
— Аниқланишича, жорий йилнинг 4 декабрь куни Пастдарғом тумани «Қатортерак» маҳалласидаги намунали уйлар ортида жойлашган Пастдарғом тумани ободонлаштириш дирекциясига қарашли цемент маҳсулотларини қайта ишлаш заводи кўрикдан ўтказилганда шу кунга қадар ҳеч қандай ҳужжатлар расмийлаштирилмаган ҳолда электр энергиясидан (электр ҳисоблагичсиз) тўғридан тўғри фойдаланиб келган.
Ушбу ҳолат юзасидан, МИБ Пастдарғом туман бўлими ходимлари томонидан «Электр энергиясидан фойдаланиш қоидалари бузилганлиги» ҳақида (МИБ НВ ЭҲ-007509) далолатнома ҳамда «Маъмурий ҳуқуқбузарлик тўғрисидаги» (МИБ СА-0010426) баённома расмийлаштирилган.
Расмийлаштирилган ҳужжатларга завод ходимлари қўл қўйишдан бош тортганлиги сабаб шу маҳаллада яшовчи фуқаролар З.Султонова ва Н.Жўрақуловалар иштирокида яна бир далолатнома тузилган.
Шунингдек, заводга тегишли трансформатордаги автоматдан муҳрлаш йўли билан электр энергияси тармоғидан узиш жараёнида туман ҳокимининг ёрдамчиси А.Мардиев ва фуқаро Р.Аннабозоровлар томонидан қаршилик кўрсатилганлиги рост.
Шундан сўнг фуқаро Р.Аннабозоров туман ҳокимининг ёрдамчиси А.Мардиевнинг оғзаки топшириғига асосан МИБ туман бўлими ходимлари томонидан тамғаланган муҳрларни қасддан бузиб, электр энергиясидан ноқонуний фойдаланишини давом эттираверади.
Бу орада ходимларимиз томонидан заводни таянч изолятор нуқтасидан узиш мақсадида туман электр тармоқлари корхонасининг навбатчилик қисмига мурожаат қилинган.
Мурожаатга асосан туман электр тармоқлари корхонаси раҳбари Х.Ҳаитов ҳамда ходимлари воқеа жойига етиб келган. Бироқ завод электр энергиясидан ноқонуний фойдаланаётганлигини ҳақида тегишли ҳужжатлар расмийлаштирилган бўлса-да, турли хил баҳоналарни рўкач қилиб, заводни электр тармоғидан узмайди.
Қонун талабларига кўра, завод аввало «Ўздавэнергоназорат» инспекциясидан ҳаво линияси ва ўрнатилган трансформатор пункти учун «Хизмат лойиҳа»сига эга бўлиши, 20 кВт.ли кучланишдан юқори бўлган объектлар учун шарт бўлган электр тармоқлари корхонасидан истеъмолчи сифатида рўйхатдан ўтиши лозим.
Бироқ жорий йилнинг 5 декабрь куни туман электр тармоқлари корхонаси раҳбари Х.Ҳаитов ушбу йўриқномага амал қилмасдан бюронинг Пастдарғом туман бўлими ходимларининг иштирокисиз, ҳеч қандай ҳужжатларсиз янги электрон ҳисоблаш тизимидаги (АSKUE) электр ҳисоблагич ускунасини ўрнатиб кетади.
Туман электр тармоқлари корхонаси раҳбари Х.Ҳаитовнинг ўз хизмат вазифасини суиистеъмол қилганлиги юзасидан вилоят электр тармоқлари корхонасига тақдимнома киритилди.
Бундан ташқари, Пастдарғом тумани ободонлаштириш дирекциясига қарашли цемент маҳсулотларини қайта ишлаш заводи ходими Р.Аннабозоров ва туман ҳокими ёрдамчиси вазифасида ишлаб келаётган А.Мардиевнинг ҳаракатларига ҳуқуқий баҳо бериш учун ҳолат туман прокуратураси томонидан ўрганилмоқда.
Айни пайтда завод томонидан электр энергиясидан ноқонуний фойдаланиши бўйича етказилган зарар миқдорига аниқлик киритилмоқда. Шундан келиб чиқиб, айбдорларнинг жавобгарлик масаласи ҳал этилади.
Изоҳ (0)