Хусусий турфирма орқали Умра зиёратига жўнатилган 14 нафар ўзбекистонликнинг визаси сохта бўлиб чиққани учун Арабистонга киритилмасдан депортация қилингани ҳақида хабар берилган эди. Туризмни ривожлантириш давлат қўмитаси воқеа юзасидан муносабат билдирди.
Унда умра зиёратини ташкил этиш бўйича йиллар давомида кўплаб муаммолар йиғилиб қолгани ва уларни тизимли равишда ҳал қилиш кераклиги билдирилган.
Жумладан, ўзбекистонликларнинг Умра зиёратига бўлган эҳтиёжи Диний қўмита томонидан қондирилмаётгани, турли чекловлар орқали муаммоларни бартараф этиб бўлмаслиги, аксинча, Умра зиёратларини бозор муносабатлари ва фуқароларнинг эҳтиёжларидан келиб чиққан ҳолда ташкиллаштириш мақсадга мувофиқлиги айтилган.
Ўзбекистонда Умра зиёратига юбориш бўйича фақат Ўзбекистон Мусулмонлар Идораси ва Дин ишлари бўйича қўмита биргаликда амалга ошириши, хорижда бу тўлиғича бозор муносабатларига таяниб ташкил этилиши, ўнлаб сайёҳлик фирмалари бу билан шуғулланиши таъкидланган. Жумладан, Туркияда 156 та, Индонезияда 101 та, Малайзияда 71 та ва қўшни Қозоғистонда 30 га яқин фирма мамлакатларида қонунчилик билан мустаҳкамланган аниқ тартиб-таомил асосида Умра зиёратини ташкиллаштириши қайд этилган.
«Бунинг натижасида эса, мазкур зиёратни амалга оширишга қодир бўлган кишиларнинг йиллаб навбат кутиши, сафар нархининг асоссиз кўтарилиши, фуқароларнинг айланма йўллар орқали зиёратни амалга ошириши ва тадбиркорлик субъектларининг яширин иқтисодиёт вакиллари сифатида сафарларни ташкил этиши каби нохуш ҳолатларга барҳам берилган», — дейилади қўмита муносабатида.
Шунингдек, қўшимча қилинишича, Ўзбекистонда Умра сафарларини амалга оширишни хоҳловчилар сонининг кўплиги ҳамда амалдаги тартиб асосида уларнинг хоҳиши тўлақонли қондирилмаётганлиги сабабли минглаб фуқаролар мавжуд тартибни четлаб ўтган ҳолда туризм ташкилотлари ва бошқа воситачи шахслар орқали зиёратларини ташкиллаштиришига олиб келмоқда.
Мавзуга доир: «Умра саёҳат эмас, ибодат». Дин ишлари қўмитаси Умрадан фойда кўрмаслигини маълум қилди
«Бу соҳадаги мавжуд муаммоларни бартараф этиш фақатгина турли чекловларни ўрнатиш орқали эмас, балки фуқароларимизда муқаддас зиёратларни амалга оширишга бўлган эҳтиёжнинг катталигини инобатга олган ҳолда, уларнинг саломатлиги ва хавфсизлигини таъминлаш ҳамда фуқароларнинг мавжуд тартибни четлаб ўтишларининг олдини олиш мақсадида Умра зиёратларини бозор муносабатлари ва фуқароларнинг эҳтиёжларидан келиб чиққан ҳолда ташкиллаштириш мақсадга мувофиқ ҳисобланади», — дея Умра зиёратидаги чекловларни олиб ташлашга чақирди Туризмни ривожлантириш қўмитаси.
Изоҳ (0)