Бугунги кунда Ўзбекистондаги профилактика инспекторларининг 72 фоизи қўл кишанлари билан таъминланган. Бу ҳақда ИИВ Ҳуқуқбузарликлар профилактикаси бош бошқармаси бошлиғи Бахтиёр Бердиалиев маълум қилди, деб ёзмоқда «Kun.uz».
Хабар берилишича, Сенатнинг Мудофаа ва хавфсизлик масалалари қўмитаси йиғилишида ушбу масала кўтарилганидан сўнг, профилактика инспекторларини қўл кишанлари билан таъминланганлиги 45 фоиздан 72 фоизга кўтарилган. Яна 3 кундан сўнг бу кўрсаткич 100 фоизга етказилиши кутилмоқда.
Шунингдек, профилактика инспекторларининг 97,4 фоизи ўзлари фаолият олиб бораётган ҳудудда хизмат уйига эгалиги маълум қилинди. Айни пайтда профилактика ходимларининг яна 2,3 фоизига маҳаллий ҳокимликлар томонидан уй қуриш ишлари олиб борилмоқда.
Қайд этилишича, хизмат уйлари маҳаллий бюджетлар ҳисобидан ажратилган бўлиб, улар таянч пунктлари профилактика инспекторлари учун хизмат фаолияти жараёнида яшаш учун мўлжалланган. Бошқа ишга ўтганда бу уй унинг ўрнига тайинланган профилактика инспекторига ўтади. Шу сабабли хизмат уйларини профилактика инспекторларининг номига расмийлаштириб бериш кўзда тутилмаган.
Бахтиёр Бердиалиевнинг сўзларига кўра, таянч пунктларининг профилактика инспекторлари ўзлари фаолият олиб бораётган жойда ажратилган хизмат уйларида яшаши шарт. Агар уларнинг ўзларига ажратилган хизмат уйларида яшамаётгани аниқланса, улар ички ишлар органлари сафидан четлаштирилади.
Изоҳ (0)