Хорватияга теннис бўйича халқаро университетлар чемпионатида иштирок этиш учун келган Нигериянинг икки нафар спортчиси ноқонуний йўл билан мамлакатга келган муҳожирлар деб топилиб, Босния ва Герцеговинага юборилган. Бу ҳақда «Интерфакс» хабар қилди.
Ушбу воқеа 17 ноябрда содир бўлган. Загребда айланиб юрган қора танли ёшлар ҳужжатлари йўқлиги оқибатида паспортлари ҳостелда қолганини тушунтиришга уринганига қарамай ҳуқуқ-тартибот органлари ходимини ишонтира олмаган. Полициячилар уларни Босния ва Герцеговина чегарасига олиб келиб, муҳожирлар гуруҳи билан бирга қоронғу ўрмон орқали қўшни давлат ҳудудига ўтишга мажбурлаган.
Шу тариқа спортчилар Велика-Кладуша шаҳридаги қочоқлар лагерига бориб қолган ва у ерда иссиқлик ҳамда сув таъминотисиз оғир шароитларда яшаган. Ноябрь охирига келиб, лагердаги кўнгиллилар чемпионат ташкилотчилари билан боғланиб бўлган вазиятни тушунтирган.
Хорватия ҳукумати аввал ҳам мигрантларга нисбатан қўпол муносабат туфайли бир неча марта танқид қилинган. Полициячилар ва ҳарбийлар чегарадан ўтаётганларни аёвсиз калтаклайди, уларнинг телефонларини синдиради ва бу орқали ўзларининг «сувдан қуруқ чиқиши»ни таъминлайди.
Изоҳ (0)