Озарбайжон президенти Илҳом Алиев Миллий мажлисни (парламент) тарқатиб юборди ва қонунчилик органига навбатдан ташқари сайловларнинг 2020 йил 9 февралда ўтказилишини белгилайдиган фармойиш чиқарди. Бу ҳақда «ТАСС» хабар берди.
«Озарбайжон республикаси конституциясининг 98.1-моддаси биринчи қисми ҳамда 109-моддаси биринчи бандига кўра, Озарбайжон миллий мажлиси бешинчи чақируви тарқатиб юборилсин. Озарбайжон миллий мажлиси навбатдан ташқари сайловлари 2020 йил 9 февралда ўтказилсин», — дейилади ҳужжатда.
Ўтган ҳафтада «Янги Озарбайжон» ҳукмрон партияси депутатлари Миллий мажлисни тарқатиб юбориш ташаббусини илгари сурган. Улар давлар раҳбарининг ислоҳотларини амалга ошириш, қонунчилик органини ислоҳ қилиш ва парламентга янги қон олиб кириш мақсадида ушбу ишни амалга ошириш зарурлигини билдирган. Мустақил ва мухолифат депутатлари ҳам ушбу ташаббусни қўллаб-қувватлаган.
Душанбада парламент ҳам ҳукмрон партия таклифларини ўрганиб чиққан ва кўпчилик овоз билан президентга қонунчилик органини тарқатиб юбориш ва тегишли қарор билан навбатдан ташқари сайловларни ўтказиш бўйича мурожаат йўллаганди.
Мавзуга доир:
Озарбайжон Миллий мажлисида (бир палатадан иборат парламент) 125 нафар депутат фаолият олиб боради, улар беш йилга сайланади. Бешинчи чақирув парламенти таркиби 2015 йил 1 ноябрда ўтказилган сайловлардан кейин тасдиқланган. Навбатдаги сайловлар 2020 йил ноябрида ўтиши режалаштирилганди.
Изоҳ (0)