Ўзбекистон Бош прокуратураси ва Адлия вазирлиги АҚШ, Швейцария, Франция, Россия ва Латвия каби давлатлар билан Гулнора Каримованинг жиноий йўллар орқали топган ва ушбу давлатларнинг айримларида жиноят ишлари доирасида 1,3 миллиард доллардан ортиқ даромадларини қайтариш бўйича ҳамкорлик олиб борилмоқда.
Фото: «Фонд Форум»
Мазкур ҳамкорлик давомида халқаро тузилмалар ва фуқаролардан Гулнора Каримованинг илгари эълон қилинган ҳукмларда назарда тутилмаган янги жиноятлари тўғрисида хабарлар келиб тушган. Бош прокуратура баёнотига кўра, ушбу ҳолатлар бўйича янги жиноят ишини қўзғатиш учун асос бўлган.
Тергов жараёнида аниқланишича, Гулнора Каримова ўзига яқин шахслардан иборат бўлган бир неча уюшган жиноий гуруҳларни ташкил этган ҳолда жиноий уюшмани бошқариб келган. Тергов томонидан Гулнора Каримова унга республика саноат корхоналарида фаолият юритган ва жуда кўп миқдордаги жиноий даромадлардан улуш бериб келган яна бир уюшган жиноий гуруҳга эга бўлгани аниқланган.
Бундан ташқари, Гулнора Каримова фуқаролар ва турли компаниялар эгаларига босим ўтказиш ва қўрқитиш йўллари орқали уларнинг мулкларини ўзига тегишли бўлган компанияларга расмийлаштириб беришга мажбур қилган. «Мазкур тергов қилинаётган жиноят иши доирасида етказилган зарарнинг миқдори 165 миллион доллар ва 85 миллиард сўмдан кўпроқни ташкил қилди», — дейилади прокуратура ахборотида.
Гулнора Каримовага Жиноят кодексининг тегишли моддаларида назарда тутилган товламачилик, талон-торож қилиш, Ўзбекистоннинг манфаатларига хилоф равишда битимлар тузиш ва жиноий уюшмани ташкил этиш билан боғлиқ жиноятларини содир этганлиги бўйича янги айблов эълон қилинган ва унга нисбатан жиноят ишлари бўйича Яшнобод туман судининг ажрими билан қамоққа олиш тарзидаги эҳтиёт чораси қўлланилган.
«Жиноят иши тергови жараёнида Гулнора Каримованинг ҳуқуқлари ва қонуний манфаатларини ўзи ва яқин қариндошлари томонидан жалб қилинган етти нафар адвокат ҳимоя қилмоқда. Шунингдек, адвокатларнинг барча тергов ҳаракатларида иштироки ва у билан ҳеч қандай чекловларсиз холи учрашиш имконияти таъминланган», — дейилади Бош прокуратура ахборотида.
Қўшимча қилишларича, ҳозирда жиноят иши бўйича тергов ҳаракатлари якунланган бўлиб, Гулнора Каримова жиноят иши ҳужжатлари билан адвокатлар иштирокида танишиб чиқмоқда.
Гулнора Каримованинг қамоқ муддати узайтирилгани ҳақида аввалроқ, 3 декабрь куни унинг қизи Имон Каримова Instagram’да эълон қилган эди. Айни вақтда у жиноят ишининг мақоми «махфий» эканини маълум қилган эди.
«Фуқаролар ва журналистлардан саволлар оқими кўпайиб бораётгани муносабати билан, жамоамиз Гулнора Каримовага қарши сиёсий мотивга эга иш бўйича тўлиқ ахборотни эълон қилиб боришни бошлайди», — деб ёзганди Имон Каримова. У бу ишни расмийларнинг Гулнора Каримованинг «қамоқ муддатини узайтириш ва уни тўлиқ изоляцияда сақлаб туриш» йўлидаги бешинчи уриниш деб атаганди.
Гулнора Каримова 2015 йил августида беш йилга озодликдан маҳрум қилинган. Ўша вақтда унга нисбатан яна бир жиноят иши бўйича тергов давом этаётган эди. Жамоатчилик бу ҳақда фақат 2017 йил июлига келибгина хабар топган.
Гулнора Каримова 2019 йил мартидан бери Тошкент вилоятининг Зангиота туманидаги 21-сон умумий тартибдаги колонияда сақланмоқда. Август ойида Бош прокуратура Каримова хонимга нисбатан давлат маблағларини талон-торож қилиш ва Ўзбекистоннинг манфаатларига хилоф равишда битимлар тузиш, шунингдек, товламачилик йўли билан ўзгаларнинг ўта йирик миқдордаги мулкларини эгаллаб олиш ҳолатлари бўйича жиноят ишлари қўзғатилганини маълум қилганди.
