Ўзбекистонлик олимлар нефть ва газ конларида ёнғиннинг олдини олувчи восита ихтиро қилди

Ўзбекистон Фанлар Академияси умумий ва ноорганик кимё институтида белгиланган вазифалар юзасидан илмий ишланмалар ва изланишлар олиб борилди. Натижада мамлакатда илк бор дунёда ўхшаши бўлмаган полиетилентерефталатдан тайёрланган янги сузувчи понтонлар ихтиро этилди ва уларни ишлаб чиқариш технологияси яратилди. Бу ҳақда Инновацион ривожланиш вазирлиги матбуот хизмати «Дарё»га хабар берди.

Полиетилентерефталат (ПЕТ) понтон нефть маҳсулотлари ва газ конденсатини қабул қилиш, узатиш, сақлаш ҳамда резервуарларда тўсатдан ёнғин пайдо бўлганида ўчириш чоғида буғланиш орқали енгил углеводородлар йўқотилишини бартараф этишга мўлжалланган. Бундай понтон махсус ёнғиннинг олдини олувчи, портлашга қарши эритма ва инерт газ билан тўлдирилади.

Унинг афзаллиги шундан иборатки, у идишда резервуардаги суюқ газ конденсати устки қисмининг 98 фоизини қоплайди. Шу боис углеводородлар буғланиши кескин камаяди. Бундан ташқари, понтоннинг ҳар бир элементида ёнғин ўчиришнинг техник ечими мужассам этилган.

Бугунги кунга қадар темирли-қалқувчи конструксияли понтонлардан фойдаланиларди. Улар коррозияга чидамсизлиги, чўкиб кетиш хусусияти, оғирлиги ва бир томонга эгилиб кетиши билан кўп ноқулайликлар туғдиради. Вақт ўтиши билан уларнинг сиртида пайдо бўладиган пирофор қатлам эса портлаш ва ёнғинга олиб келиши мумкин эди. 2000 йили Кўкдумалоқ нефть-газ конденсати конидаги ёнғин айнан пирофор қатлам туфайли юзага келган бўлиб, ёнғин улкан иқтисодий ва ижтимоий-экологик зарар келтирган.

Янги конструксияли понтондан фойдаланилганда 2000 квадрат метр ҳажмли резервуарда йилига 240 тонна енгил углеводород тежалади. Ҳозирда сузувчи понтонлардан фойдаланиш бўйича тажриба-ишлаб чиқариш тестлари муваффақиятли ўтиб, улар «Ўзбекнефтгаз» АЖнинг газ-нефтни қайта ишлаш корхоналарига жорий этилди.

Лойиҳани амалга ошириш учун бугунгача пойтахтимизнинг Мирзо Улуғбек туманидаги саноат зонасида технологик ускуналарни ўрнатиш, монтаж қилиш ва ишга тушириш ишлари амалга оширилди. Бугунги кунга қадар 150 минг дона сузувчи понтон ишлаб чиқарилди ва буюртмачиларга етказиб берилди.

Ушбу лойиҳаларни ишлаб чиқаришга жорий этиш валюта маблағларини тежаш, маҳаллий инновацион маҳсулотларни хорижий мамлакатларга олиб чиқиш, мамлакатнинг экспорт салоҳиятини мустаҳкамлаш имконини беради, дейилади хабарда.

Реклама ҳуқуқи асосида.