Газ қувурларининг демонтаж қилиниши оқибатида Тошкентнинг айрим туманларида газ тақчиллиги кузатилди. Бу ҳақда «Ўзтрансгаз» компанияси матбуот хизмати маълум қилди.
«Дарҳақиқат, Роҳат мавзеси томондан Қўйлиқ бозоригача бўлган Тошкент ҳалқа йўли бўйлаб ер усти метро қурилиши вақтида, зарурат туфайли, 1,5 километр узунликдаги газ қувури демонтаж қилинди. Шу сабабли совуқ кунларда шаҳарнинг айрим ҳудудларида табиий газ тақчиллиги кузатилди», — дейилади компания ахборотида.
Бугунги кунда газ қувурини, уни йўлнинг нариги тарафига ўтказиш орқали, қайта тиклаш ишлари олиб борилмоқда. Ҳозиргача диаметри 700 мм бўлган 800 метр қувур ётқизиб бўлинган. Қурилишга 35 дан ортиқ мутахассис ва 14 та махсус техника жалб этилган. Қурилиш ишлари туну-кун олиб борилаётганини маълум қилган «Ўзтрансгаз» «вақтинчалик ноқулайлик учун» узр сўраган.
«Gazeta.uz»нинг қўшимча қилишича, газ қувури айнан қачон демонтаж қилингани ва уни қайта тиклаш ишлари айнан қачон якунланиши ҳақида аниқ маълумот олиб бўлмаган.
Бундан ташқари, 29 ноябрь куни Facebook’даги «ТЧСЖ и как с ним жит?» гуруҳида Тошкентдаги Маҳтумқули кўчаси ва Оҳангарон йўли кесишмасидаги уч қаватли остин-устун йўл қурилиши давомида магистрал газ қувурининг бир қисми демонтаж қилингани ҳақида аноним хабар қолдирилган эди.
«Барча саъй-ҳаракатларга қарамай, иссиқлик тармоқларини қайта ётқизиб чиқиш ишлари кутилган самарани бермади ва илк қаҳратондаёқ шаҳар музлаб қолди. Не бахтки, илиқ кунлар кутилмоқда. Шаҳар бўйлаб газ босимининг пасайиб кетгани иссиқлик таъминоти корхоналарига ҳароратни ҳеч бўлмаса норматив кўрсаткичга етказиш имконини бермади. Оқибатда шаҳар музламоқда, ҳамма норози. Нега бундай бўлди? Сабаб, таъкидланганидек, иссиқлик манбаларига етказиб берилаётган газ босимининг пастлигида. Маълум бўлишича, уч қаватли кўприкни қуриш вақтида диаметри 700 мм бўлган ва шаҳарни газ билан таъминлаб турган икки асосий артериядан бири ҳисобланган магистрал газ қувурининг бир қисми демонтаж қилинган. Нима учун бу газ қувурини совуқ кунлар бошлангунига қадар қайта тиклаш имкони бўлмаган? Сергели 8-иссиқлик маркази, Чилонзор 5-иссиқлик маркази, Миробод 6-иссиқлик маркази ва Сергелига газ етмай қолиши ҳеч қачон кузатилмаган эди. Умид қиламанки, ‘Ўзтрансгаз’ газ қувурини тезда қайта тикланиши учун зарур чораларни кўради», — деб ёзилганди хабарда.«Gazeta.uz»нинг хабар беришича, вазиятдан бохабар манбалар бу хабарда ёзилган маълумотларни тасдиқлаган.
Маълумотларга кўра, 22 ноябрдан бошлаб Тошкентнинг жануби-ғарбий қисми — Миробод, Чилонзор, Сергели, Шайхонтоҳур, Яккасарой ва Учтепа туманларида газ босими пасайиб кетган.
Изоҳ (0)