28 ноябрда Чилонзор туманида жойлашган масжид яқинида тиланчилик қилаётган кекса аёлга моддий ёрдам кўрсатишни сўраб видеомурожаат йўлланган. Тошкент шаҳар ушбу видео юзасидан расмий муносабат билдирди.
«Тошкент шаҳар ИИББ ходимлари Чилонзор тумани ИИО ФМБ ходимлари масжид атрофида юрган аёлни топиб, энг яқин маҳалла фуқаролар йиғини – «Яккабоғ» маҳалласига олиб келган. ИИББ мутасаддилари онахонга иссиқ чой бериб, ундан кимлиги, қаердан келгани ва қандай ёрдамга муҳтожлиги ҳақида сўраган.
Аёлнинг гапларига қараганда, унинг исми Парида опа, ёши 76 да, Жиззах вилоятида туғилган. Унинг уйи ёнғин оқибатида қулаб тушгач, фарзандлари ва неваралари билан Тошкентга кўчиб келган. Оила пойтахтда ижарада яшайди, фарзандлари ишсиз, оғир молиявий аҳволда қолганлиги сабабли у ҳар куни масжид ёнида тиланчилик қилишга мажбур бўлаяпти.
ИИО ФМБ аёллар масалалари бўйича ходималари онахонни Аёлларни реабилитация қилиш ва мослаштириш марказига вақтинчалик жойлаб, жиззахлик ҳамкасблари билан боғланган. Олиб борилган ишлар давомида маълумотларнинг бир қисми тасдиқланди: Парида К. 1943 йилда Жиззах вилояти Дўстлик туманида туғилган, ҳозирда у ерда қизи М.Ж. истиқомат қилади. 3 декабрь куни Жиззах вилояти Дўстлик тумани ИИБ фуқарога ёрдам кўрсатиш бўйича ишларни ўз зиммасига олди.
Парида К.нинг яшаш шароити ўрганилгач, унинг оилавий шароити оғирлиги маълум бўлди: фарзандлари аёлни парвариш қилмайди, ҳар доим ҳам онасидан хабар олиш имконияти йўқ. Уйсиз қолган оиланинг молиявий аҳволи янада қийинлашган. Ҳозирги вақтда онахон қизи М.Ж.нинг қаромоғида. Жиззахлик ҳамкасбларимиз маълум қилишларича, Парида опага ёрдам кўрсатиш ишларида Дўстлик тумани ҳокими ўринбосари Г. Холмуродов, ушбу туман «Чинобод» МФЙ раиси М. Саидов ва аёллар масалалари бўйича профилактика инспектори лейтенант Н. Расулова иштирок этмоқда. Аёлнинг пенсия таъминоти ва стационар даволанишга жойлаш масаласи ҳал қилинмоқда» , — дейилади Тошкент шаҳар ИИББ расмий сайтидаги хабарда.
Хабарга онахонга кўрсатилган ижтимоий ёрдам, у билан қилинган суҳбатларнинг фотолавҳалари илова қилинган.
Изоҳ (0)