NaturalGas-Stream қўшма корхонасининг «Чандир» кони ходимлари томонидан Бухоро вилояти ҳудудида жойлашган «Чандир»—«Жанубий Кемачи» 57 километрли газ қувури линиясини кўрикдан ўтказиш давомида ушбу газ қувурининг 9,2 километрида ноқонуний равишда газ конденсатини олиш учун уланиш факти аниқланди. Бу ҳақда қўшма корхона матбуот хизмати маълум қилди.
Хусусан, 32 миллиметр диаметрли ва узунлиги 250 метр бўлган полиэтилен шланг ер юзасидан 20-50 сантиметр чуқурликка кўмиб қўйилган.
NaturalGas-Stream МЧЖ раҳбарияти дарҳол «Новмитан» қўрғони милиция таянч пункти участка нозирига мурожаат қилди. Газ қувурига ноқонуний уланиш факти расмийлаштирилди ва амалдаги қонунчиликка мувофиқ, тегишли чора-тадбирларни кўриш учун ушбу ноқонуний ишларга алоқадор шахсларни аниқлаш ишлари олиб борилмоқда.
Компания мутахассислари юқори босимли газ қувурида ишлаш бўйича меъёрларга риоя қилган ҳолда «Чандир»—«Жанубий Кемачи» газ қувури участкасида ноқонуний уланиш оқибатларини бартараф этди.
«Қайд этиш жоизки, қўшма корхона мутасаддилари аввал ҳам ИИБга мазкур газ қувурига шу каби ноқонуний уланишлар бўйича мурожаат қилган. Ушбу ҳолат 2017 йилдан буён тўртинчиси бўлиб, айрим ноҳалол шахсларнинг хатти-ҳаракатлари туфайли аҳолига газ етказиб беришда узилишлар юзага келмоқда ва Ўзбекистон иқтисодиётига зарар етказмоқда», — дейилади хабарда.
Изоҳ (0)