Ижтимоий тармоқларда ҳамда интернет сайтларида Самарқанд вилоят бош архитектори Бобур Элмуродов давлат мулкини талон-торож қилишда гумонланиб қўлга олинганлиги ва у гаров эвазига озод қилингани юзасидан хабарлар тарқалди. Самарқанд вилояти Қурилиш бош бошқармаси ахборот хизмати ушбу ҳолат юзасидан баёнот берди.
Қайд этилишича, Самарқанд шаҳар Зебинисобегим кўчасидаги 58-манзилда жойлашган 26 та хонадонга 7,5 миллиард сўм товон пули тўлаб берилганлиги юзасидан қўзғатилган жиноят иши доирасида 9 нафар мансабдор шахс айбдор деб топилган. Улардан 4 нафарига нисбатан жиноят ишининг қисми Ўзбекистон ЖПКнинг 84-моддасига асосан ҳаракатдан тугатилган.
«Жиноят иши бўйича ‘Afrosiyob Stroy Servis’ МЧЖ раҳбари Камолиддин Шукуров, Самарқанд шаҳар ҳокимининг собиқ ўринбосари, ҳозирги кунда Самарқанд вилояти бош архитектори Бобур Элмуродов, Капитал қурилиш дирекцияси собиқ бошлиғи Темур Халиқулов Ўзбекистон Республикаси ЖКнинг 167, 205, 228-моддалари билан айбланиб, судга берилган. Тергов натижалари бўйича Бобур Элмуродов ва Темур Холиқулов гумонланувчи ёки айбланувчи сифатида ушланмаган ва уларга нисбатан қамоққа олиш эҳтиёт чораси қўлланилмаган», — дейилади баёнотда.
Таъкидланишича, бугунги кунда мазкур жиноят иши Жиноят ишлари бўйича Самарқанд шаҳар судида мазмунан кўрилмоқда.
Изоҳ (0)