Андижон вилояти ички ишлар бошқармаси патруль-пост хизмати ва жамоат тартибини сақлаш бошқармаси патруль-пост хизмати батальони ходимлари Андижон шаҳридаги хонадонлардан бирида яшовчи ёнғин натижасида ҳалок бўлиши мумкин бўлган оиланинг 6 нафар аъзоси ҳаётини сақлаб қолди. Бу ҳақда «Дарё» мухбири хабар бермоқда.
Вилоят ИИБ патруль-пост хизмати ва жамоат тартибини сақлаш бошқармаси бошлиғи, подполковник Муҳаммаджон Нишоновнинг маълум қилишича, 3 декабрь, сешанба куни тунги соат 2:40 атрофида Андижон шаҳри «Мустақиллик» маҳалласи Пушкин кўчаси 16-уйда ёнғин келиб чиққан. Хонадон эгаси Сайдулло Эминжонов оила аъзолари билан қаттиқ уйқуда бўлгани боис ёнғин бошланганини сезмаган. Шу пайтда мазкур ҳудудда хизмат фаолиятини ўтаётган вилоят ИИБ ППХ ва ЖЦБ ППХ батальони 4-отряд ҳайдовчи-ходими, сафдор Муҳаммаджон Азизов ҳамда отлиқ отряд ходими, сафдор Санъатбек Тожибоев ушбу хонадонда ёнғинни пайқаб қолган. Ходимлар дарвозани тақиллатган ҳолда уй эгаларини уйғотишга уринган. Бироқ бунинг уддасидан чиқа олмаган.
«Шунда сафдорлар фурсатни бой бермаслик учун дарвозани бузиб ичкарига киради ва хонадон эгаларини уйғотишга эришади. Худди шу вақтда ёнғин бирданига кучайиб кетиб, олов ташқарига чиқиш йўлагини қамраб олади. Буни кўрган сафдорлар зудлик билан мобиль алоқа воситаси орқали шу атрофда хизматда бўлган шерикларини ёрдамга чақиради. Шундан кейин улар мазкур хонадонда яшовчи 6 кишини ёнғин бўлаётган хоналардан қўшни хонадон деворига нарвон қўйган ҳолда хавфсиз жойга олиб чиқади.
Шу тариқа ППХ ходимлари Эминжоновлар оиласи аъзолари — эр-хотин ва уларнинг 4 нафар фарзанди ҳаётини сақлаб қолади», — дейилади хабарда.
Андижон вилояти ФВБ Ёнғин хавфсизлиги бошқармаси матбуот хизмати раҳбари Азизбек Ёрқуловнинг айтишича, мазкур бахтсиз ҳодиса тўғрисида диспетчерлик хизматига 3 декабрь куни тахминан соат 2:47 да ёнғин содир бўлаётганлиги тўғрисида хабар келиб тушган. Хабарга асосан жанговар ёнғин ўчириш экипажлари соат 2:52 да манзилга етиб бориб, 3:10 да ёнғинни ўчиришга муваффақ бўлган.
Олиб борилган терговга қадар текширув ишлари давомида ёнғин монтаж қилинган электр кабелларининг қисқа туташуви оқибатида келиб чиққанлиги аниқланган.
Ёнғин оқибатида Пушкин кўчаси 15-уйнинг 50 квадрат метр том, шифт қисми ва уй-рўзғор буюмлари ёниб зарарланган. Ёнғин ўчирувчиларнинг саъй-ҳаракатлари билан яшаш уйининг 320 квадрат метр қисми ва 1 дона Damas русумли автомашина ёнғиндан сақлаб қолинган.
Содир бўлган ёнғин ҳодисасида фуқароларда тан жароҳати олиш ва ҳалок бўлиш ҳолатлари қайд этилмаган. Ҳолат юзасидан суриштирув ишлари Андижон шаҳар Ёнғин хавфсизлиги бўлими томонидан олиб борилмоқда.
Изоҳ (0)