Тошкент метросининг Юнусобод йўналишида иккита янги бекат қурилиши бўйича олиб борилаётган қурилиш ишлари доирасида иккинчи туннелда бурғулаш ишлари якунига етказилди. Бу ҳақда «Ўзбекистон темир йўллари» АЖ маълум қилди.
Хабар берилишича, ҳозирги кунда Юнусобод йўналишининг ўнг туннелида бурғулаш ишлари тугатилиб, мавжуд бўлган «Шаҳристон» бекати билан улаш ишлари бошлаб юборилди.
Қайд этилишича, муҳандислик-коммуникация тизимларини созлаш, мавжуд бўлган «Шаҳристон» ҳамда қурилаётган «Туркистон» ва «Юнусобод» бекатларини бирлаштириш, шунингдек, темир изларини ётқизиш ишлари давом этмоқда.
Бугунги кунга келиб ушбу қурилиш лойиҳаси доирасида амалга оширилган умумий иш ҳажмининг 90 фоиздан ортиғи бажарилган. Қурилиш белгиланган жадвалга мувофиқ амалга ошириб келинмоқда ва жорий йил охирига қадар «Туркистон» бекатига синов тариқасида поездлар қатнови йўлга қўйилиши режалаштирилган. 2020 йилда эса йўловчилар учун поездлар ҳаракати йўлга қўйилиши кутилмоқда.
Аввалроқ Шавкат Мирзиёев мазкур йўналишда олиб борилаётган қурилиш ишлари билан танишган эди. Қурилишга Германия технологияси ва мутахассислари жалб этилган.Маълумот учун, Юнусобод йўналиши эса 2001 йил 24 октябрда дастлабки олти бекат — «Мингўрик», «Юнус Ражабий», «Абдулла Қодирий», «Минор», «Бодомзор», «Ҳабиб Абдуллаев» номлари билан фойдаланишга топширилган.
Изоҳ (0)