Бухорода бир муддат уй хизматчиси бўлиб ишлаган фуқаро хонадон эгасининг темир сейфидан 15 миллион сўм нақд пулларини ўғирлаб кетди ва қўлга олинди. Бу ҳақда Бухоро вилоят ИИБ «Дарё»га хабар берди.
Маълум бўлишича, Қоракўл туманида яшовчи фуқаро Э.У. туман ИИБга номаълум шахс томонидан хонадонидаги темир сейфдан 15 миллион сўм нақд пуллари ўғирлаб кетилганини маълум қилган.
Олиб борилган тезкор суриштирув ишлари натижасида ушбу ўғирлик бундан бир неча ой илгари унинг хонадонида маълум муддат томорқа ишларини бажариб келган уй хизматчиси томонидан содир этилгани аниқланган.
Тумандаги «Дарғали» маҳалласида яшовчи Х.Ж. ушбу хонадонда темир сейф ва унинг калити қаерда туришидан хабардор бўлган. У қўлга олингунга қадар ўғирланган 15 миллион сўм пулнинг ярмидан ортиғини сарфлашга улгурган. Қолган 7 миллион сўм пул Х.Ж.дан ашёвий далил сифатида тегишли тартибда олинган.
Ҳолат юзасидан Х.Ж.га нисбатан Ўзбекистон Республикаси Жиноят Кодексининг 169-моддаси, 2-қисми билан жиноят иши қўзғатилган ва тергов ҳаракатлари олиб борилмоқда.
Изоҳ (0)