Ўзбекистон Мактабгача таълим вазирлиги томонидан Қибрай тумани 25-сонли мактабгача таълим муассасасида текширув ўтказилди. Бу ҳақда Бош прокуратура томонидан хабар берилди.
Маълум қилинишича, текширувда Қибрай тумани 25-сонли мактабгача таълим муассасасида 180,4 миллион сўмлик озиқ-овқат маҳсулоти ўзлаштириш йўли билан талон-торож қилинганлиги аниқланган.
Хусусан, муассаса омборидаги маҳсулотлар саноқдан ўтказилганда 33 турдаги 21,6 миллион сўмлик озиқ-овқат маҳсулоти камомади аниқланган.
Бундан ташқари, 2018—2019 йиллар давомида 4,1 тонна 134,7 миллон сўмлик гўшт ҳамда 24 миллион сўмлик 7,9 минг литр сут маҳсулотлари ташкилот тарбияланувчиларга берилмасдан ўзлаштириб юборилган.
Мазкур ҳолат юзасидан 2019 йил 19 ноябрда Бош прокуратура ҳузуридаги Иқтисодий жиноятларга қарши кураш департаментининг Қибрай тумани бўлими томонидан Ўзбекистон Республикаси Жиноят кодексининг 167-моддаси 3-қисми «а» банди билан жиноят иши қўзғатилиб, терговга тегишлилиги бўйича туман прокуратурасига юборилган.
Жиноят иши бўйича ҳозирда дастлабки тергов ҳаракатлари олиб борилмоқда.
Тошкент вилояти МТБ бошлиғининг 27 ноябрдаги буйруғига асосан мазкур мактабгача таълим муассасаси мудираси З.С. эгаллаб турган лавозимидан озод этилган.
Изоҳ (0)