«Postda.uz» «Қўйлиқ деҳқон бозори атрофида пиёдалар ўтиш йўли мавжуд эмаслиги, одамлар кўприк остида йўлнинг қатнов қисмида ҳаётини хавф остига қўйиб йўлни кесиб ўтишга мажбур бўлаётганига эътибор қаратди.
Яқин-яқингача кўпчилик бозорга ўтиш ва қайтишда ерости йўлидан фойдаланарди. Айни пайтда янги метро линияси қурилиши муносабати билан деҳқон бозорига ўтадиган ерости йўли ёпиб қўйилган.
Қайд этилишича, одамлар қатнов қисмини кўприк остидан кесиб ўтяпти. Йўл серқатнов, табиийки, бу ердан ўтиш анчагина хавфли. Инсофли ҳайдовчилар-ку, пиёда йўлни кесиб ўтаётганини кўриб тезликни пасайтиряпти.
«Беш бармоқ баробар бўлмаганидек, пиёдадан олдин ўтиб кетиш истагида тезликни баттар ошираётганлари, устига устак, узлуксиз сигнал чалиб ўтиб кетаётганлари ҳам учраб турибди. Бозор ҳудудидаги автотураргоҳ яқинида хизмат олиб бораётган ЙПХ ходимлари эса ‘Тўхташ тақиқланади’ белгиси ўрнатилган ҳудудга қўйилган машиналарни бартараф қилиш билан банд.
Воқеани 2 декабрь куни кеч соат 19:00 лар атрофида тахминан ярим соатларча кузатдик. Ҳайриятки, йўл-транспорт ҳодисаси содир бўлмади. Таассуфки, эрталаб яна айни шу манзара гувоҳига айландик.
Бизнингча, фуқаролар хавфсизлигини таъминлаш учун йўлнинг мақбул қатнов қисмига вақтинчалик йўл белгисини ўрнатиш ёки пиёдалар ўтиш йўлини барпо этиш мақсадга мувофиқ. Бунга қадар эса ЙПХ ходими қатновни тартибга солиб туриши керак эмасми? Ёхуд муаммога ечим топиш учун бирон-бир кўнгилсиз ҳодиса рўй бериши шартми?!», — дейилади хабарда.
Изоҳ (0)