“Postda.uz” “Qo‘yliq dehqon bozori atrofida piyodalar o‘tish yo‘li mavjud emasligi, odamlar ko‘prik ostida yo‘lning qatnov qismida hayotini xavf ostiga qo‘yib yo‘lni kesib o‘tishga majbur bo‘layotganiga e’tibor qaratdi.
Yaqin-yaqingacha ko‘pchilik bozorga o‘tish va qaytishda yerosti yo‘lidan foydalanardi. Ayni paytda yangi metro liniyasi qurilishi munosabati bilan dehqon bozoriga o‘tadigan yerosti yo‘li yopib qo‘yilgan.
Qayd etilishicha, odamlar qatnov qismini ko‘prik ostidan kesib o‘tyapti. Yo‘l serqatnov, tabiiyki, bu yerdan o‘tish anchagina xavfli. Insofli haydovchilar-ku, piyoda yo‘lni kesib o‘tayotganini ko‘rib tezlikni pasaytiryapti.
“Besh barmoq barobar bo‘lmaganidek, piyodadan oldin o‘tib ketish istagida tezlikni battar oshirayotganlari, ustiga ustak, uzluksiz signal chalib o‘tib ketayotganlari ham uchrab turibdi. Bozor hududidagi avtoturargoh yaqinida xizmat olib borayotgan YPX xodimlari esa ‘To‘xtash taqiqlanadi’ belgisi o‘rnatilgan hududga qo‘yilgan mashinalarni bartaraf qilish bilan band.
Voqeani 2-dekabr kuni kech soat 19:00 lar atrofida taxminan yarim soatlarcha kuzatdik. Hayriyatki, yo‘l-transport hodisasi sodir bo‘lmadi. Taassufki, ertalab yana ayni shu manzara guvohiga aylandik.
Bizningcha, fuqarolar xavfsizligini ta’minlash uchun yo‘lning maqbul qatnov qismiga vaqtinchalik yo‘l belgisini o‘rnatish yoki piyodalar o‘tish yo‘lini barpo etish maqsadga muvofiq. Bunga qadar esa YPX xodimi qatnovni tartibga solib turishi kerak emasmi? Yoxud muammoga yechim topish uchun biron-bir ko‘ngilsiz hodisa ro‘y berishi shartmi?!”, — deyiladi xabarda.
Izoh (0)