26—27 ноябрь кунлари ижтимоий тармоқларда, хусусан, Instagram’да фойдаланувчи «gafurovskiy.95» томонидан фотосурат эълон қилинди, деб хабар беради Экология ва атроф-муҳитни муҳофаза қилиш қўмитаси матбуот хизмати.
Фотосуратда ёш йигит ўлдирилган тулки ва вишилдоқ оққушни қўлида ушлаб тургани, ерда эса учта каптар ва қуён ётганини кўриш мумкин.
«Суратга кўра, барча ҳайвонлар ва қушлар ўлдирилган. Шуни таъкидлаш керакки, вишилдоқ оққуш ҳам Ўзбекистон «Қизил китоби»га, ҳам Халқаро «Қизил китоб»га киритилган», — дейилади хабарда.
Ҳисоб-китобларга кўра, ҳайвонот оламига етказилган умумий зарар 12 миллион сўмдан ошади.
«Суратдаги йигитнинг шахсини аниқлаш ва қонун ҳужжатларида белгиланган тартибда тегишли чоралар кўриш учун барча мавжуд маълумотлар, шу жумладан, ижтимоий тармоқларда эълон қилинган фотосурат Ички ишлар вазирлиги ва Бош прокуратурага юборилди.
Ушбу ҳолат Экология ва атроф-муҳитни муҳофаза қилиш қўмитаси назорати остига олинган. Кейинги барча маълумотлар қўмитанинг расмий веб-сайтида эълон қилиниши айтилади», — дейилади хабарда.
Изоҳ (0)