«Дарё»да Самарқанддаги мактабда электрдаги муаммо сабаб ўқувчилар қоронғи ва зах хонада дарс ўтаётгани ҳақида хабар берилган эди. Самарқанд ҳудудий электр тармоқлари корхонаси мазкур ҳолатга муносабат билдирди.
Маълумот беришларича, Самарқанд вилоятининг Ургут туманига электр энергия таъминоти 110 кВли Л-Панжикент ва Л-ПТФ электр узатиш тармоқлари орқали етказиб берилади. Ушбу линиялар SAON автоматика тизимига киритилган.
Республика энерготизимида электр энергия танқислиги ва электростанцияларида электр энергия ишлаб чиқарадиган генераторларда носозликлар кузатилгани сабаб юқорида кўрсатилган линияларда автоматик тарзда ўчишлар содир бўлмоқда.
Бундан ташқари, ҳаво ҳароратининг совуқлиги сабаб истеъмолчилар бино-иншоот ва уйларни иситиш учун электр энергиядан, корхона мутасаддиларининг фикрича, норационал фойдаланмоқда. Натижада республика энерготизими қўшимча юкламалар билан ишлаяпти.
«Яъни, электр сарфи Самарқанд вилояти учун ажратилган лимитдан ошиб кетиб, Миллий диспетчерлик хизмати томонидан берилган топшириқдан чиқишга тўғри келяпти», — дейилади Самарқанд ҳудудий электр тармоқлари корхонаси муносабатида.
Таъкидланишича, республика энерготизимининг бир маромда ишлашини ташкил этиш мақсадида Самарқанд вилояти бўйича 35—110 кВли электр узатиш тармоқларига чеклашлар жорий этилишига мажбур бўлинмоқда ва шу боис мактабларга бир маромда электр энергияси етиб бормаяпти.
«Шу муносабат билан Самарқанд ҳудудий электр тармоқлари корхонаси истеъмолчиларнинг электр энергия таъминотини яхшилаш мақсадида имкон даражада барча чораларини кўрмоқда ва етказилган ноқулайликлар учун истеъмолчилардан узр сўрайди. Корхона раҳбарияти электр энергияси таъминотидаги муаммолар, шикоят, мурожаат ва таклифларни 1154 телефон рақами орқали қабул қилади», — дейилади корхона муносабатида.
Изоҳ (0)