29 ноябрда Лондон марказидаги кўприкда йўловчиларга пичоқ билан ҳамла қилган эркакнинг шахси аниқланди. Бу ҳақда Meduza хабар қилган.
Ҳужум оқибатида икки нафар одам ҳалок бўлган. Қотил ҳам ўлдирилган. У пичоқ билан беш нафар йўловчини жароҳатлашга улгурган. Яъни пичоқланганларнинг икки нафари ўлган, уч нафари жароҳат билан шифохонага ётқизилган. Полиция ходимлари воқеа жойига беш дақиқада етиб келган ва жиноятчини отиб ташлаган. Ҳукумат вакиллари ушбу ҳаракатни теракт деб атамоқда.
Ҳужум уюштирган жиноятчи худкушлар нимчасини, яъни бомба ўрнатилган жилетни кийиб кўприкдаги одамларга ҳужум қилган. The Times нашрининг ёзишича, Лондон кўпригидаги ҳужумдан аввал Кембриж университетида маҳбуслар реабилитацияси бўйича конференцияда бўлган. Тадбирда барчани портлатиб юборишини айтиб таҳдид қилган.
Полиция берган маълумотга кўра, Стаффордширда яшаган 28 ёшли Усмон Хон 2012 йилда террорчиликка алоқадор жиноятда айбланиб суд қилинган ва 2018 йил декабрида озодликка чиққан. Sky News канали, 2012 йилда Усмон Хоннинг Покистонда террорчилар учун ҳарбий лагер тузиш ҳамда Лондон фонд биржасига ҳужум қилишга урингани учун қамалганини аниқлаган. Қамоқдан чиққач у қаерда ҳаракатланаётгани ҳақида ҳуқуқ-тартибот идораларига маълумот бериб турувчи махсус электрон браслет билан юрган.
Шу куни Нидерландиянинг Гаага шаҳрида ҳам пичоқ билан қуролланган шахс томонидан йўловчиларга ҳужум уюштирилган. Шаҳар марказида уч нафар одам пичоқланган. Улар шифохонага олиб келинган, кейинроқ ҳолатлари барқарорлашгач, уйга кетишга рухсат берилган. Ҳужум уюштирган жиноятчи воқеа жойидан яширинган. Ҳозирда у полиция томонидан қидирилмоқда. Жиноятнинг амалга оширилишига нима сабаб бўлгани ҳам суриштирилмоқда.
Изоҳ (0)