29-noyabrda London markazidagi ko‘prikda yo‘lovchilarga pichoq bilan hamla qilgan erkakning shaxsi aniqlandi. Bu haqda Meduza xabar qilgan.
Hujum oqibatida ikki nafar odam halok bo‘lgan. Qotil ham o‘ldirilgan. U pichoq bilan besh nafar yo‘lovchini jarohatlashga ulgurgan. Ya’ni pichoqlanganlarning ikki nafari o‘lgan, uch nafari jarohat bilan shifoxonaga yotqizilgan. Politsiya xodimlari voqea joyiga besh daqiqada yetib kelgan va jinoyatchini otib tashlagan. Hukumat vakillari ushbu harakatni terakt deb atamoqda.
Hujum uyushtirgan jinoyatchi xudkushlar nimchasini, ya’ni bomba o‘rnatilgan jiletni kiyib ko‘prikdagi odamlarga hujum qilgan. The Times nashrining yozishicha, London ko‘prigidagi hujumdan avval Kembrij universitetida mahbuslar reabilitatsiyasi bo‘yicha konferensiyada bo‘lgan. Tadbirda barchani portlatib yuborishini aytib tahdid qilgan.
Politsiya bergan ma’lumotga ko‘ra, Staffordshirda yashagan 28 yoshli Usmon Xon 2012-yilda terrorchilikka aloqador jinoyatda ayblanib sud qilingan va 2018-yil dekabrida ozodlikka chiqqan. Sky News kanali, 2012-yilda Usmon Xonning Pokistonda terrorchilar uchun harbiy lager tuzish hamda London fond birjasiga hujum qilishga uringani uchun qamalganini aniqlagan. Qamoqdan chiqqach u qayerda harakatlanayotgani haqida huquq-tartibot idoralariga ma’lumot berib turuvchi maxsus elektron braslet bilan yurgan.
Shu kuni Niderlandiyaning Gaaga shahrida ham pichoq bilan qurollangan shaxs tomonidan yo‘lovchilarga hujum uyushtirilgan. Shahar markazida uch nafar odam pichoqlangan. Ular shifoxonaga olib kelingan, keyinroq holatlari barqarorlashgach, uyga ketishga ruxsat berilgan. Hujum uyushtirgan jinoyatchi voqea joyidan yashiringan. Hozirda u politsiya tomonidan qidirilmoqda. Jinoyatning amalga oshirilishiga nima sabab bo‘lgani ham surishtirilmoqda.
Izoh (0)