Инвестициялар ва ташқи савдо вазирлиги ҳамда Давлат божхона қўмитасининг товарларни божхона ҳудудида қайта ишлаш божхона режимига жойлаштиришни соддалаштириш тўғрисидаги таклифи маъқулланиши мумкин. Бу норматив-ҳуқуқий ҳужжатлар муҳокамаси порталида жойлаштирилган Президент қарори лойиҳасида кўзда тутилган.
Қарор лойиҳасига мувофиқ, 2020 йил 1 январдан бошлаб шундай тартиб ўрнатилади:
а) товарни божхона ҳудудида қайта ишлашга қуйидаги талабларга ва шартларга риоя этган ҳолда йўл қўйилади:
- олиб кирилган товарни уни қайта ишлаш маҳсулотларида идентификациялаш;
- қайта ишлаш маҳсулотларининг чиқиш нормасини белгилаш;
- товарларни тақиқ ва чекловлардан истисно этиш;
- товарларни ишлаб чиқариш;
- товарларни қайта ишлаш, шу жумладан монтаж қилиш, йиғиш, ёки бошқа товарларга мослаштириш;
- товарни таъмирлаш, шу жумладан, уни тиклаш ва иш ҳолатига келтириш;
- қадоқлаш, ўраш ва саралаш;
- товарларни тозалаш.
Қайд этилишича, Ўзбекистонга охирги 4 йил давомида 8 328,5 миллион долларлик ёки умумий импорт ҳажмининг 17,5 фоизи миқдорида технологик ускуналар олиб келинган. Шу билан бирга товарларни қайта ишлаш ва ички ишлаб чиқариш ҳажми ўртача 7,8 фоизга ўсган бўлиб, бу республиканинг ишлаб чиқариш салоҳиятидан тўлиқ фойдаланилмаётганлигидан далолат.
Изоҳ (0)